Dımashtyń arqasynda reıtıngim kóterilip, shetelden stýdentter telefon shaldy - Marat Áıtimov
AQTÓBE. QazAqparat - Dımashtyń ustazy Marat Áıtimov búgin Aqtóbe mýzykalyq kolledjiniń stýdentteri aldynda shákirtine alǵys aıtty. Sońǵy kúnderi reıtıngi kóterilip, Reseı men Qyrǵyzstan, elimizdiń ár óńirinen stýdentter habarlasyp, Aqtóbedegi mýzyka kolledjine aýysý usynysyn aıtqan, dep habarlaıdy QazAqparat tilshisi.
Qytaılyq Hýnan telearnasynyń «Men ánshimin» baıqaýynda baq synap jatqan Dımash Qudaıbergenniń ustazy Marat Áıtimov búginde el nazaryn ózine aýdardy. Álem sahnasyn baǵyndyrýǵa bel býǵan, tórt jyl boıy tálim alyp, alǵashqy kúni-aq Qytaıda kózip, el nazaryna ilikken Dımash ustazyna da jol ashyp bergen sekildi. Marat Áıtimov búgin Ahmet Jubanov atyndaǵy Aqtóbe mýzykalyq kolledjinde stýdentter aldynda shákirtine alǵysyn aıtty.
«Astanadaǵy ustazdaryna unaı ma, unamaı ma, ony bilmedim. Dımash ustazy týraly suraǵan adamǵa meniń aty-jónimdi aıtady. Sol úshin de men oǵan alǵys aıtamyn. Dımashtyń, konkýrstyń arqasynda meniń reıtıngim 10, tipti 20 satyǵa joǵary kóterildi. Basqa oblystardan ǵana emes, basqa memleketten, Qyrǵyzstannan, Reseıden stýdentter habarlasty. Sol jerde oqıtyn stýdentter Aqtóbe mýzykalyq kolledjine aýysyp, menen dáris alǵysy keletinin aıtqanda abdyrap qaldym. Bul jaýapty júk»,- dedi Marat Áıtimov.
Onyń aıtýynsha, mýzyka kolledjinde dáris beretin ár ustazdyń óz ádistemesi, syry bar. Kolledjdegi 4 jyl Dımashtyń qalyptasýyna, damýyna úlken septigin tıgizdi. Qazirgi Dımashtyń jetistigi ustaz ben shákirttiń ortaq jeńisi, jemisi, tynymsyz eńbektiń nátıjesi.
«Bárine birdeı unaıtyn stýdentti men qatty jaqsy kórmeımin. Mýzykada belgili bir sheńberden asyp ketýge bolmaıdy, biraq jaqsy nátıjege qol jetkizetin minez bolýy kerek. Men solaı oılaımyn. Ol sabaq alǵan kezde esh qınalmady, jattaýǵa da sergek. Tipti,oǵan jetkizbek bolǵan oıymdy birden uǵyp, aıtqyzbaı-aq bildi. Mýzyka, minez, stılde de. Sebebi, ol únemi izdenis ústinde júrdi. Іzdedi, tyńdady, qarady. Men qatty maqtaǵandy, kóp sóılegendi jaqsy kórmeımin. Az sóılep, jumys istegen, jaqsy nátıjege qol jetkizgen janyma jaqyn»,- dedi Marat Áıtimov.
Ustaz ári janashyr aǵa Dımashtyń osy qalpynda qalýyn tiledi. Ol jaqynyna, janyndaǵy dosy men kórshisine, tipti, beıtanys muqtaj adamǵa qolda baryn beretin jomart jan. Aqtóbe oblystyq jastar resýrstyq ortalyǵy uıymdastyrǵan kezdesýde ustazy Marat Áıtimov «Eýrovıdenıe» baıqaýyna qatysý týraly oılar men usynystar týraly pikirin jetkizdi.
«Men sońǵy jyldary bul konkýrsty qaramaımyn. Ol jerdegi kóp nárseni túsinbeımin. Mentalıtetimizde aıyrmashylyq bar sııaqty. Bireý saǵan unasa, sońǵy jaǵynda turady. Nátıjesinde men kútpegen adam jeńimpaz bolyp jatady. Sondaı-aq «Eýrovıdenıe» ónerdiń shyrqaý shegi, shyńy emes. Dımash «Evrovıdenıesiz» de qolyńnan ne keletinin kórsete alady»,- dedi Marat Áıtimov.
