Dımashtyń jobasy Túrkistannyń týrıstik oryndaryn tanystyrady
ASTANA. KAZINFORM – Dımashtyń Voice Beyond Horizon jobasynyń jańa shyǵarylymy Túrkistan oblysynyń týrıstik áleýetin tanystyrady. Bul týraly Týrızm jáne sport mınıstrliginiń baspasóz qyzmeti habarlady.
Voice Beyond Horizon halyqaralyq jobasynyń ekinshi shyǵarylymy Túrkistan oblysynyń týrıstik lokatsııalaryn sheteldik keń aýdıtorııaǵa tanystyrady. Jańa epızod búgin Qytaı ýaqytymen saǵat 22:00 Hunan TV telearnasynda kórsetiledi.
6 elden jınalǵan oryndaýshylardyń shyǵarmashylyq sapary óńirdiń mańyzdy baǵyttaryn qamtıdy. Sheteldik kórermender Uly Jibek jolynyń mádenı jáne saýda ortalyǵy bolǵan Kúltóbe qalashyǵyn tamashalaı alady. Joba qatysýshylary úshin kóne órkenıetterdiń biregeı eskertkishi - Otyrar qalashyǵy shabyt kózine aınalady.
Týrıster arasynda tanymal oryndardyń biri «Etnoaýyl» ulttyq-mádenı kesheninde qazaq halqynyń dástúrleri, salt-dástúrleri men mádenıeti tanystyrylady. Bul shyǵarylymda qazylar alqasynda bolatyn «Gremmı» syılyǵynyń eki dúrkin laýreaty Ýolter Afanaseff ótken jyly túsirilimderge qatysý úshin Túrkistanǵa arnaıy kelgen.
Dımash Qudaıbergen jobany Hunan Broadcasting System kompanııasymen birlesip júzege asyryp jatyr. Túsirilim elimizdiń 6 óńirin qamtydy. Bul joba ártúrli elderdiń shyǵarmashylyq oryndaýshylaryn biriktirip qana qoımaı, Qazaqstannyń týrıstik áleýetin mıllıardtaǵan kórermenge tanystyrady. Hunan TV telearnasynyń aýdıtorııasy 1,9 mıllıardtan asady. Joba Mango TV tsıfrlyq platformasynda da kórsetiledi.
Aıta ketelik Túrkistanda túsirilgen halyqaralyq telejoba 100 mln-nan asa qaralym jınaǵan.
