Dımashtyń jankúıerlerinen 3 000 eýrolyq qaıyrymdylyq: qarajat kimge berildi
ASTANA. KAZINFORM — Dımashtyń Madrıdtegi kontserti qarsańynda jankúıerleri 3 000 eýrony qaıyrymdylyqqa aýdardy, dep habarlaıdy dimashnews.
30 qazanda Madrıdte ótetin Dımash Qudaıbergenniń DIMENSIONS álemdik týry aıasyndaǵy kontserti qarsańynda ónerpazdyń ıspanııalyq jankúıerleri qaıyrymdylyq bastamasyn júzege asyrdy. Dımashtyń Ispanııadaǵy resmı fan-klýbynyń atynan qyzmet etetin La Gran Voz Kazaja qaýymdastyǵy estý jáne kórý qabileti qatar buzylǵan adamdarǵa kómek kórsetetin APASCIDE uıymynyń Santa Ángela de la Cruz ortalyǵyna qoldaý kórsetý maqsatynda 3 000 eýro bóldi.
Fan-klýb ókilderiniń aıtýynsha, qaıyrymdylyq sharasyn uıymdastyrýǵa Dımashtyń ıgi isteri men ózgelerge qoldaý kórsetýdiń mańyzdylyǵyn únemi dáriptep júrgen ónegesi úlgi bolǵan eken. Bıyl jankúıerler ónerpazdyń Ispanııaǵa kelýine oraı erekshe syı jasaýdy uıǵaryp, kómekke muqtaj jandarǵa qarjylaı qoldaý kórsetýdi jón kórgen.
La Gran Voz Kazaja qaýymdastyǵynyń ókilderi Santa Ángela de la Cruz ortalyǵyna arnaıy baryp, mekeme qyzmetkerlerimen jáne qamqorlyǵyndaǵy jandarmen kezdesti. Sondaı-aq ortalyqtyń jumysymen tanysyp, estý jáne kórý qabiletinen qatar aıyrylǵan adamdarǵa kúndelikti kórsetiletin kútim men qoldaý sharalary týraly málimet aldy.
— Dımashtyń ıgi isterinen úlgi alyp, onyń izgi bastamalaryn jalǵastyrý maqsatynda kómekke asa muqtaj jandarǵa qoldaý kórsetýdi uıǵardyq. Eń qundy syılyq — ózgelerge jaqsylyq jasaý múmkindigi degen senimimizdi Dımash ta qoldaıtynyna kámil senemiz, — dep atap ótti fan-klýb ókilderi.
Kezdesýge qatysýshylarǵa ortalyqtyń «Biz — sizderdiń ortaq kózderińiz ben qulaqtaryńyzbyz» degen urany erekshe áser qaldyrdy. Óz kezeginde ıspanııalyq Dears jankúıerleri bul sózderdi «Biz sizderdiń daýystaryńyz ári júrekterińiz bolǵymyz keledi» dep sımvoldyq mánde tolyqtyrdy.
Ortalyqtyń qamqorlyǵyndaǵy jandar da Dımash Qudaıbergen men onyń jankúıerlerine arnap ym tili arqyly alǵystaryn bildirdi.
— Dımash, APASCIDE uıymynyń estý jáne kórý qabiletinen qatar aıyrylǵan jandaryna kórsetken qoldaýyńyz úshin raqmet! Dears, Santa Ángela de la Cruz ortalyǵyna arnaıy kelgenderińiz úshin sizderge de alǵys aıtamyz! Barshańyzǵa raqmet! — dedi olar.
Osyǵan deıin Polshada Dımash jankúıerleriniń kezdesýine 400-den astam adam jınalǵanyn jazǵanbyz.
