Dımashtyń jankúıerlerin oqyǵan synyby, otyrǵan partasy, sabaq úlgerimi qyzyqtyrdy – ustazy
AQTÓBE. KAZINFORM – Ánshi Dımash Qudaıbergen 31 jasqa toldy. Aqtóbede týyp-ósken ánshi álem juldyzyna aınalyp úlgerdi. Ony alǵashqy ustazdary men jankúıerleri jan-jaqtan quttyqtap, jyly lebizin arnap jatyr.
Dımash Qudaıbergen 1994 jyldyń 24-mamyry kúni ómirge keldi. Ol Qanat jáne Svetlana Qudaıbergenovter otbasynyń tuńǵyshy. Tuńǵysh bala ata-ájesi Qudaıbergen men Mıýa Aıtbaevtardyń baýyrynda ósti. Aqtóbedegi №32 mektep gımnazııasynda bilim alyp, osy mektepte 9-synypty aıaqtady. Alǵashqy ustazy – Klara Qajǵalıeva. Ánshiniń týǵan kúninde ustazdy óz lebizin bildirip, mekteptegi fotosyn jarııalady.
– Denniń saýlyǵyn, otbasyńnyń amandyǵyn tileımin. Álemdi ánmen terbep, júregińniń jylýymen barsha jandy qýantyp, eldi birlikke úndep júrgen jansyń. Árbir shyrqaǵan ániń barsha jannyń júreginen oryn alsyn. Sizdiń de oılaǵan arman-maqsattaryńyz oryndalsyn, - dep jazdy ustazy. Ánshi Dımash Qudaıbergen de óz rızashylyǵyn bildirgen.
Atap óteıik, Klara Qajǵalıeva áli kúnge deıin №32 mektep gımnazııada bastaýysh synyp oqýshylaryna sabaq beredi. Shetelden, elimizdiń túkpir-túkpirinen kelgen jankúıerlerimen kezdesip, olarǵa shákirti jaıly qyzyqty derekter aıtýdan jalyqqan emes. Ol óz estelikterinde Kazinform tilshisiniń Dımash Qudaıbergenniń sabaqty ándetip aıtatynyn, Abaıdyń qara sózderi men óleńderin súıip oqıtynyn aıtyp berdi.
– Dımash jattaýdy ándetip aıtyp beretin. Úzilis kezinde de dırıjer sekildi qolyn sermep, ándetip júrdi. Al Álippemen qoshtasý kezinde Abaıdyń «Jelsiz túnde jaryq aı» ánin fortepıanoda oryndap berdi. Ol mektepke deıin-aq kúısandyqta oınaǵan. Sonymen birge bastaýyshpen qoshtasý kontsertinde «Aq kógershin» ánin de aıtyp berdi. Qytaıdaǵy konkýrsyna beınetaspanyń kóshirmesin berdim. Keıin Qytaıdan kelgen tilshiler kelip, túsirip, qajetti materıaldaryn jınap aldy. Dımash bastaýyshty úzdik oqyǵan oqýshy. Sabaqtan múlde qalmady. Qatarlastarymen dos, tatý boldy, únemi kóńildi júrdi. Ata-analar jınalysyna atasy men ájesi qatar kelip otyrdy. Atasy Qudaıbergen Raýshan men Mansur oqyǵan kezde de meni kórse kelip, amandasyp, izdep turatyn, batasyn beretin, - dedi Klara Qajǵalıeva.
Onyń aıtýynsha, Dımashpen mektepke kelmes buryn-aq tanysqan. Ol kezde mektep ákimshiligi 1 synypqa qabyldanatyn oqýshylardyń tizimin muǵalimge berip, keıin muǵalim úı-úıdi aralap, tanysatyn. Sol tanysý keshi Aqtóbe qalasyndaǵy Cherepanov kóshesinde boldy.
– Dımash turatyn úıge bardym.Ata-ájesi nemeresin oqytý úshin aýyldan qalaǵa kóship kelgen eken. Úıinde bala kóp boldy. Dımashty shaqyrdy. Boıy uzyn boldy. Shash úlgisi de erekshe edi. Dımash Qudaıbergen oqyǵan synyp óte alǵyr, bilimdi. Árqaısysy ár salada abyroıly eńbek etip júr. Qazir ózim sol mektepte jumys isteımin. Shákirtimniń jankúıerleri kelse, kútip alyp, qyzyqtyrǵan suraqtaryna jaýap beremin. Olardy oqyǵan synyby, otyrǵan partasy, dostarymen qarym-qatynasy, sabaq úlgisi qyzyqtyrdy. Mektepte mýzeı bar. Onda fotosýretteri men oqý úlgerimi jazylǵan jýrnaly tur. Sonymen birge qabyrǵady fotosy ilýli, - dedi ustazy.
Klara Qajǵalıevanyń aıtýynsha, Dımash tabandylyǵynyń arqasynda búgingi beleske kóterildi. Mektep jasyna deıin túrli konkýrstarǵa qatysty, mektep kezinde de vokaldan sabaq aldy, eńbektendi.
Al taıaýda ánshiniń «Taý ishinde» ánine jarııalaǵan chellendjine Klara Qajǵalıeva oqýshylarmen birge qatysyp, áleýmettik jelide qaralymy mıllıonnan asty.
– Dımash chellendj jarııalaǵan kezde Aqtóbeden qatysyp jatqan adamdardy kórmedik. Sodan soń ózim alǵash bop bastadym. Qazirgi 1 synypqa sabaq beretin bolǵan soń bıleıtin bala tappaı, Shamshyraq atty oqýshyma aıttym. Ol janyna bıshi qyzdy ertip kelip, tórt balamen túsirdik. Áleýmettik jelige ózderi jarııalap, mıllıon qaralym jınady. Keıin aqtóbelikter qoldap ketti. Sheteldik jankúıerleri kóp qoldaý bildirip jatyr. Almatyda jankúıerleri kezdesý ótkizip, Aqtóbege kelýi múmkin. Munda mektepke keledi. Maǵan da aldyn ala habaryn berip qoıady, - dedi ustazy.
Aıta keteıik, Dımashqa vokaldan sabaq bergen - Marat Áıtimov. Ol A.Jubanov atyndaǵy mýzykalyq kolledjde dáris beredi. Ol da shákirtiniń fanattaryn únemi qushaq jaıa qarsy alady. Ol kezdesýde bar syryn ashpaǵanymen, ánshiniń basynan keshken qyzyqty oqıǵalarymen bólisedi. Al fortepıanony Dına Nııazova úıretti.