Dımashtyń jańa áni Latyn Amerıkasy radıosynan berildi

ASTANA. KAZINFORM - 28 aqpanda Latyn Amerıkasynyń «Andromeda» radıostantsııasynyń «Dımashtyń ǵalamy» baǵdarlamasynda qazaqstandyq ónerpazdyń «When I’ve Got You» atty jańa áni alǵash ret shyrqaldy, dep jazady dimashnews.com. 

Tyńdaýshylarǵa shyǵarma unaǵany sonsha, olar radıojúrgizýshilerden ony qaıta qoıýyn ótindi.

Universo Dimash («Dımashtyń ǵalamy») baǵdarlamasy alǵash ret osydan týra bir jyl buryn, 2023 jyldyń 1 naýryzynda Qazaqstanda Alǵys aıtý kúni men Naýryz meıramynyń qarsańyna oraı efırge shyqqan edi.

Dımashtyń ánderi alǵash ret 7 aqpanda Meksıka radıosynan shyrqalǵan bolatyn. Al buny uıymdastyrǵan ánshiniń halyqaralyq Mahabbat Dears fan-klýby edi.

Efırdiń tyńdaýshylar arasynda úlken tolqý men suranys týdyrǵany sonsha, Andromeda Radio júrgizýshileri tolyǵymen qazaqstandyq oryndaýshynyń shyǵarmashylyǵyna arnalǵan jańa baǵdarlama jasaýdy uıǵardy. «Dımashtyń ǵalamy» atty baǵdarlama qurylǵannan beri efırde 14 epızod jaryq kórdi.

28 aqpan kúngi radıostantsııada qazaqstandyq ónerpaz Dımash Qudaıbergenniń kóptegen týyndylarynyń shyǵý tarıhy baıandalyp, ánderi shyrqaldy. Tyńdarmandar «When I’ve Got You» jańa ániniń tusaýkeserinen lázzat alyp, sondaı-aq: Battle of Memories, Neverland, War and Peace, Our Love, Be Happy, The meaning of eternity, Restart my love, The Crown jáne t.b. qytaı ánderin erekshe ásermen tyńdady.