Dımashtyń «Voice Beyond Horizon» jobasynyń jeńimpazy anyqtaldy
ASTANA. KAZINFORM – Qazaqstandyq ónerpaz Nurjas Sadyrbaev «Voice Beyond Horizon» jobasynda birinshi oryn alyp, «Dańq juldyzy» ataǵyna ıe boldy, dep habarlaıdy Dimashnews.com saıty.
Atalǵan joba Qazaqstannyń halyq ártisi Dımash Qudaıbergenniń bastamasymen júzege asyryldy. Túrkistanda bastaý alyp, Aqtaý men Almaty qalalarynda jalǵasyn taýyp, bas qala Astanada qorytyndylandy.
Qytaı, Qazaqstan, Malaızııa, Serbııa, Italııa jáne Qyrǵyzstan elderinen kelgen segiz qatysýshy saparlaryn birge bastap, Qazaqstannyń kıeli jerleriniń danalyǵy men kórkemdigine kýá boldy.
Dımash Qudaıbergen atqarýshy prodıýser retinde qatysqan jańa mýzykalyq «Voice Beyond Horizon» jobasynyń alǵashqy epızody Qytaıdyń medıa keńistiginde úlken rezonans týdyrdy.
Jobanyń aýqymdy tabysy Hunan TV telearnasynyń keshendi esebimen de rastaldy. Premera Qytaıdyń CVB jelisindegi aımaqtyq spýtnıktik telearnalar arasynda, ulttyq CSM jelisinde jáne CSM71 qalalyq jelisinde senimdi túrde kósh bastady.
Sonymen qatar KuYun jáne Huanwang reıtıngterinde de aımaqtyq spýtnıktik arnalar arasynda birinshi orynǵa shyqty.
Strımıngtik platformalardaǵy tikeleı efırlerdiń jalpy qaralymy 102 mıllıonnan asty. Al áleýmettik jelilerde joba tóńireginde 143-ten astam eń kóp talqylanǵan taqyryp qalyptasty.
Aıta keteıik, Dımash Qudaıbergenniń shoýy Qytaı telereıtınginde kósh bastaǵanyn jazdyq.
Al ánshi Nurjas Sadyrbaev Dımashtyń aldynda án aıtý ońaı emes ekenin moıyndady.
