Dımashtyń «Voice Beyond Horizon» halyqaralyq jobasynyń túsirilimi bastaldy
ASTANA.KAZINFORM – Ánshi Dımash Qudaıbergenniń «Voice Beyond Horizon» halyqaralyq jobasynyń túsirilimderi Túrkistan oblysynan bastaldy. Jobaǵa Qytaı, Qazaqstan, Qyrǵyzstan, Italııa, Malaızııa jáne Serbııadan oryndaýshylar qatysyp jatyr.
Mýzykalyq jobanyń qatysýshylary Túrkistan qalasyna poıyzben keldi. Túsirilim barysynda olar óńirdiń basty týrıstik jáne mádenı nysandaryn aralap, «Áziret Sultan» tarıhı-mádenı kesheni, kóne Otyrar qalashyǵy, Karavansaray týrıstik kesheni jáne etnoaýylda bolady.
Qatysýshylardyń kásibı deńgeıin arnaıy shaqyrylǵan halyqaralyq sarapshylar baǵalaıdy.
Túrkistan oblysyndaǵy túsirilim aıaqtalǵan soń, mýzykalyq shoýǵa qatysýshylar elimizdiń basqa óńirlerinde shyǵarmashylyq saparlaryn jalǵastyrady. Halyqaralyq joba Mańǵystaý, Almaty, Aqmola oblystaryn, sondaı-aq Almaty men Astana qalalaryn qamtıdy. Shoýdyń fınaly Qazaqstan astanasynda ótedi.
Aıta keteıik, Dımash Qudaıbergen «Voice Beyond Horizon» jobasyn Qytaıdyń Hunan Broadcasting System kompanııasymen birlese júzege asyryp jatyr. Kún saıyn atalǵan arna men Mango TV tsıfrlyq platformasynyń aýdıtorııasy 210 mıllıonnan asa kórermendi qamtıdy. Osy arqyly Qazaqstannyń týrıstik áleýetin álemniń mıllıondaǵan kórermeni tamashalaıdy.
Joba QR Týrızm jáne sport mınıstrliginiń, QR Mádenıet jáne aqparat mınıstrliginiń, «Kazakh Tourism» ulttyq kompanııasynyń, sondaı-aq óńirler ákimdikteriniń uıymdastyrýshylyq qoldaýymen júzege asyp jatyr.
Buǵan deıin Dımash Qudaıbergen 8 jáne 10 qazanda Mehıkoda kontserti ótetini týraly habarlaǵan bolatyn.