Dımashtyń tazysy Ǵaryshker: ánshi oǵan bul atty nege qoıǵan
ASTANA. KAZINFORM — Búgin Qazaqstanda alǵash ret Qazaq tazysy men tóbeti kúni atalyp ótip jatyr. Osyǵan oraı Jibek Joly telearnasyndaǵy «Búgin.LIVE» baǵdarlamasynda Dımash Qudaıbergenniń ákesi Qanat Aıtbaev ánshiniń Ǵaryshker atty tazysy jaıly suhbat berdi.
Qanat Aıtbaevtyń aıtýynsha, Dımash tazyǵa bul atty kezdeısoq qoımaǵan.
— Búgingi memleket basshysy bekitken ádemi kún — Tazy kúni qutty bolsyn! Qazaqtyń ulttyq bolmysy, dástúri jasaı bersin dep tileımin. Dımash tazynyń bolmysyn kórip, óte ushqyr, júırik bolsyn degen nıetpen, ǵaryshtaı jyldam bolsyn dep Ǵaryshker degen at qoıǵan. Sodan beri aty — Ǵaryshker, — dedi Qanat Aıtbaev.
Ǵaryshker alǵash kelgende kishkentaı kúshik bolǵan. Ony biraz ýaqyt qalada ustaǵanymen, tazynyń tabıǵatyna keń dala áldeqaıda jaqyn ekeni baıqalǵan. Sondyqtan otbasy ıtti dostarynyń sharýashylyǵyna ákelip, erkin dalada ósirýge sheshim qabyldaǵan.
Qazir Ǵaryshker túlki men qoıanǵa salynyp, ańshylyqqa baptalyp júr. Qanat Aıtbaev onyń daladaǵy erkin ómirge tez beıimdelgenin aıtady. Ańǵa túskende shıraq qımyldap, óziniń júıriktigin kórsetedi.
— Biz Ǵaryshkerdi qalada ustap kórdik, biraq janary solyp, dalaǵa úırengen ıt ekeni baıqaldy. Qazir dala tósinde erkin oınap, júgirip, qoıan aýlap ósip keledi. Onyń ustaǵan ańyn kórip, qýanyp qalamyz, — dedi ol.
Qanat Aıtbaevtyń aıtýynsha, Ǵaryshkerdiń minezi de tazyǵa tán. Kóp úre bermeıdi, sabyrly ári momaqan. Biraq ańshylyq kezinde kózi jaınap, bar bolmysy ashyla túsedi.
— Tazy tuqymdasy óte sırek úredi, sabyrly bolady. Ǵaryshkerdi qolymyzǵa alǵaly beri bir úrgenin kórmeppin. Óte momaqan, biraq ańǵa túskende kózi jaınap ketedi. Ańshylyqta óte jyldam, ásirese qysty kúni keremet kórinis, — dedi Qanat Aıtbaev.
Dımashtyń shyǵarmashylyq saparlary kóp bolǵandyqtan, Ǵaryshkerdi kúndelikti qasyna ertip júrýge múmkindigi joq. Alaıda elge kelgen saıyn ánshi dalaǵa shyǵyp, atqa minip, óziniń tazysyna arnaıy baryp turady.
Qazaq halqy tazyny ejelden erekshe baǵalaǵan. Onyń júıriktigi men ańshylyq qabileti kóshpeli ómirde mańyzdy ról atqaryp, qıyn kezeńderde eldiń kúnkórisine de sep bolǵan. Tazynyń osy qasıetteri ony qazaqtyń dástúrli mádenıetiniń ajyramas bóligine aınaldyrdy.
— Qazaq tazyny qatty baǵalaǵan. Ony óte taza, qasıetti dep eseptegen. Nebir zulmat jyldarda ańshylyǵymen, júıriktigimen aýyldardy asyrap qalǵan tazylar bolǵan. Sol qasıeti úshin qazaq halqy ony óte jaqsy kóredi, — dedi ol.
Aıta keteıik, 3 qyrkúıek — Qazaqstanda alǵash ret Qazaq tazysy men tóbeti kúni atalyp ótip jatyr.
Buǵan deıin, Dımash Qudaıbergen qazaq tazysy kúnine oraı biregeı kadrlar jarııalaǵan edi.
