Dımashtyń Polshadaǵy jankúıerleri Qazaqstan týraly ústel oıynyn qurastyrdy
ASTANA. KAZINFORM – Dımash Qudaıbergenniń polshalyq fan-klýby Naýryz meıramyn birqatar merekelik is-sharamen atap ótti. Ol is-sharalardyń biri jáne biregeıi «Dımashpen birge Qazaqstandy aralaıyq» atty ústel oıynynyń tusaýkeseri boldy. Bul týraly dimashnews habarlady.
Bul strategııalyq oıyn qatysýshylardy Dımash Qudaıbergenniń týǵan jerine saıahat jasaýǵa shaqyrady. Oıynshylar Qazaqstannyń keremet jerlerine baryp, qazaq eli men mádenıeti týraly qyzyqty derektermen tanysady. Іs-sharanyń basty syılyǵy — Astanadaǵy gıpotetıkalyq kontsert jáne Dımashpen kezdesý bolady. Oıyn polıak jáne aǵylshyn tilderinde qol jetimdi jáne jaqyn arada qazaq jáne ıspan tilderinde de jaryq kóredi. Oıynnyń avtorlary: Magdalena Holda, Sılvııa Shaıter-Zıýlek, Katajına Stshelınska.
Tusaýkeser naǵyz qazaq dastarhanyn jaıǵan Varshava mýltımádenı ortalyǵynda ótti. Dastarhanǵa baýyrsaq, irimshik, jent jáne qurt sııaqty dástúrli taǵamdar qoıyldy. Barlyq táttilerdi jankúıerler ózderiniń jeke retsebi boıynsha daıyndaǵan eken.
Sharaǵa Qazaqstan ókilderi Nuráli Omarqul men Nurhan Ábishev qatysyp, Naýryz meıramynyń tarıhymen, onyń sımvoldary — «Naýryz kóje» taǵamy, ulttyq kúres pen at báıgeleri týraly aqparatpen bólisti. Kezdesý sońynda olar qazaqtyń ádet-ǵurpy boıynsha shashý shashyp, qonaqtarǵa molshylyq bolsyn degen nıetpen táttiler taratty.
Mereke barysynda Varshavadaǵy «Dımash radıosynda» qazaq mýzykasy men merekesiniń mádenıetin talqylaýǵa arnalǵan arnaıy habar ótti. Polıak jankúıerleri Dımashpen kezdesý sátterin asyǵa kútip, aldaǵy kontsertterine daıyndyq ústinde.
Aıta ketelik Aqtaýda ótetin halyqaralyq sharaǵa Dımash Qudaıbergen qatysýy múmkin.