Dımashtyń Nıý-Iorktegi tarıhı kontserti jaıly derekti fılmi kórermenge jol tartady
ASTANA.KAZINFORM — Byltyr 5 qazanda Dımash Qudaıbergen álemdegi eń áıgili kontserttik alańdardyń biri Nıý-Iork qalasyndaǵy Madison Square Garden sahnasynda TMD elderinen shyqqan alǵashqy ártis retinde «Stranger» shoýyn qoıdy. Bul týraly dimashnews.com saıty jazdy.
Kontsert aıasynda Madison Square Garden sahnasynda alǵash ret Qazaqstan Respýblıkasynyń Memlekettik Gımni oryndalyp, qazaq tilindegi ánder shyrqaldy. Olardyń qatarynda avtorlyq jańa týyndysy — «Samǵaý» ániniń tusaýkeseri de boldy.
Sondaı-aq Dımash bul sahnada alǵash ret «Love’s Not Over Yet» týyndysyn oryndady. Bul ánge eki márte Grammy syılyǵynyń ıegeri Ýolter Afanasev súıemeldeý jasady.
— Kontsert baǵdarlamasynda erekshe oryn alǵan «The Story of One Sky» kompozıtsııasy keshtiń eń áserli ári emotsııalyq turǵydan mańyzdy bólimderiniń birine aınaldy, — delingen habarlamada.
Madison Square Garden sahnasyndaǵy bul alǵashqy qadam Dımash Qudaıbergenniń shyǵarmashylyq jolyndaǵy mańyzdy beles bolyp, onyń kópjyldyq eńbeginiń, kásibı damýynyń jáne úlken armanynyń júzege asýynyń aıqyn kórinisine aınaldy.
Jańa kontserttik týr qarsańynda Dımash, onyń komandasy men otbasy osy oqıǵaǵa bastaý bolǵan eńbek joly týraly estelikterimen, áserlerimen jáne emotsııalarymen «Arman tarıhqa aınalǵanda» atty derekti fılmde baıandaıdy.
Buǵan deıin Dımashtyń latynamerıkalyq jankúıerleri qazaq tilindegi halyqaralyq jobany tanystyrdy.
