Dımashtyń mýzykalyq jobasy Kaspıı men Bozjyranyń sulýlyǵyn álemge pash etti
ASTANA. KAZINFORM — Dımashtyń halyqaralyq jobasynyń túsirilimi elimizdiń eń kórikti jerleri — Kaspıı men Bozjyrada jalǵasyp jatyr, dep habarlaıdy Týrızm jáne sport mınıstrliginiń baspasóz qyzmeti.
Voice Beyond Horizon mýzykalyq jobasy — Dımash Qudaıbergen men Hunan Broadcasting System birlesip júzege asyryp jatqan bastama. Bul joba Qazaqstandy mıllıondaǵan kórermenge joǵary týrıstik áleýeti bar el retinde tanytady. Halyqaralyq jobanyń túsirilimi Túrkistan, Mańǵystaý, Almaty jáne Aqmola oblystarynda, sondaı-aq Almaty men Astana qalalarynda ótedi. Shoýdyń fınaly elordada uıymdastyrylady dep josparlanǵan.
— Dımash Qudaıbergen men jobaǵa qatysýshylar Túrkistan oblysynan Aqtaý qalasyna at basyn burdy. Túsirilim aıasynda Kaspıı teńiziniń jaǵalaýynda jáne Qazaqstannyń eń áserli tabıǵı muralarynyń biri — Bozjyra shatqalynda óner kórsetý josparlanǵan. Túsirilimge Qytaı, Qazaqstan, Qyrǵyzstan, Italııa, Malaızııa jáne Serbııadan kelgen talantty oryndaýshylar qatysyp jatyr. Qatysýshylardyń kásibı deńgeıin arnaıy shaqyrylǵan halyqaralyq sarapshylar baǵalaıdy, — delingen vedomstvo habarlamasynda.
Jobaǵa Týrızm jáne sport mınıstrligi, Mádenıet jáne aqparat mınıstrligi, Kazakh Tourism ulttyq kompanııasy jáne óńirlik ákimdikter qoldaý kórsetip jatyr.
Aıta keteıik, bıyl Týrızm jáne sport mınıstrligi 2025–2029 jyldarǵa arnalǵan «Mańǵystaý» týrıstik aımaǵyn damytý jóninde keshendi jospar ázirledi. Úkimet qaýlysymen qabyldanǵan qujat óńirdi 9 baǵyt boıynsha júıeli damytýǵa baǵyttalǵan. Bul jospar týrısterdi tartýǵa qolaıly jaǵdaı jasap, óńirdiń odan ári damýyna qolaıly ınvestıtsııalyq ahýal qalyptastyrýǵa múmkindik beredi.
Budan buryn Dımashtyń «Voice Beyond Horizon» halyqaralyq jobasynyń túsirilimi bastalǵanyn jazǵan edik.