Dımashtyń meksıkalyq jankúıerleri «Qazaqstan!» dep urandatty
ASTANA. KAZINFORM — Merıdada Dımash Qudaıbergenniń kontserti qarsańynda Dears kezdesý ótkizdi, dep habarlaıdy dimashnews.
Erteń, 11 qarashada, Meksıkanyń Merıda qalasynda Dımash Qudaıbergenniń DIMENSIONS álemdik týry aıasyndaǵy Latyn Amerıkasyndaǵy alǵashqy kontserti ótedi. Kópten kútken kontsert qarsańynda qazaqstandyq ánshiniń álemniń ár túkpirinen kelgen jankúıerleri Qazaqstan men Meksıka mádenıetin ushtastyrǵan dástúrli kontsert aldyndaǵy kezdesýde (pre-party) bas qosty.Dears Península de Yucatán fan-klýby uıymdastyrǵan merekelik kezdesý 10 qarashada El Conquistador qonaqúıinde ótti. Keshtiń qurmetti qonaqtary qatarynda ánshiniń ata-anasy Qanat jáne Svetlana Aıtbaevtar, sondaı-aq Qazaqstan Respýblıkasynyń Meksıkadaǵy elshiliginiń keńesshisi Erlan Qubashev boldy.
Kesh baǵdarlamasy mýzyka, dostyq jáne mádenı almasý taqyryptaryna arnaldy. Qonaqtar ıÝkatan túbeginiń dástúrlerimen tanysyp, «Maııa jaýyngerleriniń» ónerin, Carlos Acereto balet ujymy oryndaǵan ulttyq harana bıin tamashalady. Sondaı-aq qonaqtar jergilikti mýzykanttardyń oryndaýynda Meksıkanyń tanymal ánderin, sonyń ishinde áıgili «Bésame Mucho» týyndysyn tyńdady.
Baǵdarlamada Qazaqstan men Dımash Qudaıbergenniń shyǵarmashylyǵyna arnalǵan bólimge erekshe oryn berildi. Qonaqtarǵa ónerpazdyń týǵan eli týraly beınetanystyrylym usynylyp, jınalǵan qaýym biraýyzdan «Qazaqstan! Qazaqstan!» dep urandatty.
Kezdesýdi meksıkalyq tanymal bloger Leo Kantro (Leo Cantro) júrgizdi. Ol birneshe jyldan beri ıspantildi aýdıtorııany Dımash Qudaıbergenniń shyǵarmashylyǵymen tanystyryp, ánshiniń ónerine qatysty áserleri men pikirlerin jarııalap keledi. Sonymen qatar ónerpazdyń jańa mýzykalyq týyndylary men gastroldik saparlary týraly aqparat taratyp, suhbattaryn ıspan tiline aýdarady.
Leo Kantronyń Dımashtyń ata-anasymen kezdesýi keshtiń eń áserli sátteriniń biri boldy. Qanat, Svetlana Aıtbaevtarmen suhbattasý barysynda bloger tolqynysyn jasyra almaı, kózine jas aldy.
Ónerpazdyń ata-anasynyń án oryndaýy qonaqtarǵa erekshe tartý boldy. Qanat Aıtbaevtyń gıtaramen súıemeldeýimen olar qazaqtyń «Merekem sen» ánin shyrqady.
Meksıkalyq gıtaranyń únimen áýelegen qazaq áni merekelik keshtiń ózegine aınalǵan eki mádenıet arasyndaǵy úndestiktiń sımvoldyq kórinisi boldy.
Jankúıerler de qazaq tilinde án aıtyp, merekelik oıyn-saýyq sharalaryna, júldeler utysyna jáne ortaq fotosessııaǵa qatysty. Án men bıge ulasqan kesh Dımash shyǵarmashylyǵynyń ulty, tili men mádenıeti ártúrli adamdardy da ortaq arnaǵa biriktiretinin taǵy bir márte kórsetti.
11 qarashada jankúıerler Foro GNP Seguros arenasynda ótetin Dımash Qudaıbergenniń kontsertinde qaıta bas qosady. Bul kontsert DIMENSIONS álemdik týrynyń Latyn Amerıkasyndaǵy kezeńin ashady.
Osyǵan deıin Meksıkada Dımash Qudaıbergenge arnalǵan mýral paıda bolǵanyn jazǵanbyz.
