Dımashtyń Meksıkadaǵy kontserti qarsańynda jankúıerler bas qosty

ASTANA. KAZINFORM — 13 qarashada Meksıkanyń Monterreı qalasynda Dımash Qudaıbergenniń DIMENSIONS álemdik týry aıasyndaǵy kontserti qarsańynda halyqaralyq jankúıerler kezdesýi ótti, dep habarlaıdy dimashnews.

Dımashtyń Meksıkadaǵy kontserti qarsańynda jankúıerler bas qosty
Foto: dimashnews

Kontsert aldyndaǵy dástúrli basqosýdy Dimash & Dears Regias Monterrey fan-klýby uıymdastyrdy.

Kezdesý áıgili Fýndıdora saıabaǵy aýmaǵyndaǵy La Fundación Event Hall zalynda ótti. Uıymdastyrýshylar Soltústik Meksıka mádenıetimen tanysýǵa, mýzykalyq ónerdi tamashalaýǵa jáne ánshi jankúıerleriniń ózara pikir almasýyna múmkindik beretin mazmundy baǵdarlama usyndy.

Dımashtyń Meksıkadaǵy kontserti qarsańynda jankúıerler bas qosty
Foto: dimashnews

Keshtiń negizgi taqyryptarynyń biri Qazaqstan men Meksıka arasyndaǵy mádenı baılanys boldy. Dımash Qudaıbergen óz shyǵarmashylyǵy arqyly álem jurtshylyǵyn qazaqtyń mýzykasymen, tilimen jáne dástúrlerimen tanystyryp keledi. Osyǵan oraı meksıkalyq Dears Qazaqstannan kelgen qonaqtarǵa Monterreıdiń tarıhy men mádenı murasyn tanystyrýdy uıǵarǵan.

Kezdesý qalanyń negizi qalanýy men damýy, tarıhy jáne dástúrleri týraly derekti fılm kórsetiliminen bastaldy. Meksıka mádenıetimen tanystyrý baǵdarlamasy jergilikti ónerpazdardyń qoıylymdarymen jalǵasty.

Dımashtyń Meksıkadaǵy kontserti qarsańynda jankúıerler bas qosty
Foto: dimashnews

Sahnada monterreılik mýzykanttar Djennı Vılchıs pen Anıa Haramılo án shyrqady. Sondaı-aq qonaqtar folklorlyq balet ujymynyń ónerin tamashalap, jergilikti as mázirimen tanysyp, syılyqtar utysyna qatysty.

Іs-sharany Dımashtyń jankúıerlerine jaqsy tanys meksıkalyq belgili radıojúrgizýshi Poncho Ieska júrgizdi. Onyń qazaqstandyq ánshiniń shyǵarmashylyǵymen tanystyǵy 2021 jyly ónerpazdyń bir oryndaýyna arnalǵan beınepikirden bastalǵan bolatyn. Keıin Poncho Dımashtyń shyǵarmashylyǵyna qatysty elýden astam beınepikir jazǵan. Al 2022 jyly meksıkalyq Dears qoldaýymen qazaqstandyq ánshiniń ánderi OYE 89.7 radıostantsııasynyń efırinde berile bastaıdy.

Dımashtyń Meksıkadaǵy kontserti qarsańynda jankúıerler bas qosty
Foto: dimashnews

Osy keshke Dımashtyń anasy Svetlana Aıtbaeva men álemdik týrda ánshimen birge óner kórsetip júrgen qazaqstandyq mýzykanttar da qatysty.

Qonaqtar aldynda Temirlan Oljabaı men Ernat Naýryzdyń dombyra dýeti óner kórsetip, qazaqtyń ulttyq mýzyka ónerin tanystyrdy.

Mýzykalyq baǵdarlamaǵa Sanjaı Álmishev te qatysyp, nemis kompozıtory Djeıms Lasttyń áıgili «Jalǵyz baqtashy» aspaptyq shyǵarmasyn oryndady. Bul týyndy rýmynııalyq mýzykant George Zamfırdiń oryndaýynda álemge keńinen tanylǵan.

Kezdesý sońynda Dımashtyń anasy Svetlana Aıtbaeva jankúıerlerge izgi lebizin bildirdi. Ol meksıkalyq Dears qaýymdastyǵyna ánshige jáne Qazaqstanǵa degen yqylasy men qoldaýy, qazaq mádenıetin keńinen tanytýǵa qosqan úlesi, sondaı-aq Qazaqstan elshiligimen yntymaqtastyǵy úshin alǵys aıtty.

Dımashtyń Meksıkadaǵy kontserti qarsańynda jankúıerler bas qosty
Foto: dimashnews

Svetlana Aıtbaeva Monterreıde jýyrda Dımash Qudaıbergenge arnalyp salynǵan mýralǵa erekshe toqtaldy. Onyń aıtýynsha, qabyrǵa sýretiniń jasalǵany týraly jańalyq ánshiniń otbasy men shyǵarmashylyq ujymyn ǵana emes, kóptegen qazaqstandyqty da qýantqan.

— Eki eldiń arasyn myńdaǵan shaqyrymdar bólip jatsa da, júregimiz jaqyn. Dımashtyń mýzykasy bizdi biriktirip, Qazaqstan men Meksıka arasyndaǵy jarasymdy dostyqqa negiz qalady. Bul dostyq aldaǵy ýaqytta da nyǵaıa túsedi degen senimdemiz! Qazaqstan jasasyn! Meksıka jasasyn! Dostyǵymyz jasasyn! — dedi Svetlana Aıtbaeva.

Dımashtyń Meksıkadaǵy kontserti qarsańynda jankúıerler bas qosty
Foto: dimashnews

Ol meksıkalyq jankúıerlerge qazaqstandyqtardyń ystyq sálemin jetkizip, eki el arasyndaǵy mádenı baılanystar men dostyq qarym-qatynastyń odan ári bekı túsetinine úmit bildirdi.

Buǵan deıin Dımashtyń Meksıkadaǵy ekinshi kontserti qaıda ótetini belgili boldy.