Dımashtyń latynamerıkalyq jankúıerleri qazaq tilindegi halyqaralyq jobany tanystyrdy
ASTANA. KAZINFORM – Dımash Qudaıbergenniń latynamerıkalyq jankúıerleri alty eldiń ónerpaz jankúıerlerin biriktirgen «Omir» atty halyqaralyq shyǵarmashylyq jobany usyndy. Bul týraly dimashnews.com saıty habarlady.
Bastamaǵa Kosta-Rıka, Meksıka, Bolıvııa, Argentına, Ýrýgvaı jáne Chılı elderinen kelgen Dears qaýymdastyǵynyń ókilderi qatysty.
Jankúıerler qazaq tilindegi «Omir» ánin oryndaý úshin birikti, olardyń aıtýynsha, bul kompozıtsııa Dımashtyń ózi úshin de, álemdegi jankúıerleri úshin de erekshe mańyzǵa ıe.
Ár qatysýshy jobaǵa óz úlesin qosyp, ortaq ıdeıa jolynda ýaqytyn jáne shyǵarmashylyq eńbegin arnady. Uıymdastyrýshylardyń aıtýynsha, alty el bir maqsatqa birigip, Dımashtyń shyǵarmashylyq jolyna degen qurmetin bildirip, onyń týǵan kúnine oraı «birtutas únge» aınaldy.
Álemniń túkpir-túkpirindegi Dımash jankúıerleri onyń ánderin qazaq tilinde alǵash ret oryndap otyrǵan joq, olar án mátinderiniń maǵynasyn zerttep, durys aıtylýyn úırenip, mýzyka arqyly Qazaqstan mádenıetimen tanysyp keledi. Qatysýshylardyń sózinshe, dál Dımashtyń shyǵarmashylyǵy kóptegen sheteldik tyńdarmandardy qazaq tili men ulttyq mádenıetke qyzyǵýshylyq tanytýǵa shabyttandyrady.
— «Omir» áni arqyly biz oǵan degen eń izgi tilekterimizdi, erekshe talanty úshin shynaıy alǵysymyzdy, sondaı-aq latynamerıkalyq Dears qaýymdastyǵynyń Dımashqa degen sheksiz mahabbaty men qoldaýyn jetkizgimiz keldi, — dep bólisti joba qatysýshylary.
Aıta ketelik Madrıdte Dımash Qudaıbergen týraly derekti fılmniń tusaýkeseri ótken edi.
