Dımashtyń kostıými aýktsıonda satyldy: qarajat tasqyn sýdan zardap shekken aımaqtarǵa jiberiledi

ALMATY. KAZINFORM - Almaty qalasynda «DAULETTEN qaıyrymdylyq qory» uıymdastyrǵan qaıyrymdylyq keshte Dımash Qudaıbergenniń kostıými aýktsıonda 2 000 000 teńgege satyldy, - dep habarlaıdy «Dauletten» qaıyrymdylyq qorynyń baspasóz qyzmeti.

Atalmysh kostıýmdi tanymal ánshi Alla Pýgachevanyń Máskeýde ótken mereıtoıyna oraı uıymdastyrylǵan «Podarok dlıa Anny» atty shyǵarmashylyq keshinde kıgen. Onda Dımash Igor Krýtoıdyń «Lıýbov, pohojaıa na son» ánin oryndady. Kostıým dızaıneri – Atelier Leka.

Qaıyrymdylyq qory tarapynan uıymdastyrylǵan aýktsıonda alǵashqy lottyń baǵasy 500 000 teńgeden bastaldy. Aýktsıon sońynda kostıým 2 000 000 teńgege satyldy. Bul lotty qazaqstandyq kásipker, qarjylyq saýattylyq boıynsha mentor Erkebulan Áripbaı satyp aldy.

«Men bul kostıýmdi inime syılaımyn. Ol 11-synypty aıaqtaıyn dep jatyr. Ózi de Dımash Qudaıbergenge uqsaıdy. Týystarymyzdyń bári ony Dımashqa uqsatady», - dedi ol.

Bul atalmysh keshte 2 000 000 teńgege baǵalanǵan eń úlken lot boldy. Sondaı-aq, qaıyrymdylyq keshinde «GGG fýtbolka» 1 000 000 teńgege, qazaqstandyq mını-fýtbolıst, Qaırat jáne Qazaqstan quramasynyń shabýylshysy Serik Jamanqulov kıgen fýtbolka 300 000 teńgege, «Ordabasy» fýtbol klýbynyń jáne Qazaqstan Ulttyq quramasynyń kapıtany Ashat Taǵybergenniń fýtbolkasy 300 000 teńgege satyldy. Aýktsıonda Mustafa Óztúriktiń qoly qoıylǵan kitap ta boldy.

Aıta ketý kerek, «Dauletten qory» tarapynan uıymdastyrylǵan bul keshte jıyny 7 000 000 teńge jınaldy. Aýktsıonnan jınalǵan qarajat qaıyrymdylyqqa jumsalmaq. Elimizde bolyp jatqan sý tasqyny saldarynan zardap shekken óńirlerge gýmanıtarlyq kómek kórsetiledi.