Dımashtyń Qazaqstanda túsirilgen halyqaralyq jobasy Qytaıda kórsetiledi
ASTANA. KAZINFORM – 5 aqpanda Qytaıdyń Hunan TV telearnasynda halyqaralyq mýzykalyq Voice Beyond Horizon jobasynyń resmı premerasy ótedi. Jobanyń túsirilim jumystary tolyqtaı Qazaqstan aýmaǵynda júrgizilip, eldiń alty óńirin qamtydy.
Qytaılyq buqaralyq aqparat quraldarynyń málimetinshe, joba 2026 jylǵy 5 aqpannan bastap ár beısenbi kúni saǵat 22:00-de Qytaıdyń Hunan TV telearnasy men Mango TV onlaın platformasynda qatar kórsetiledi.
Joba Qytaımen qatar elimizde de «Qazaqstan» ulttyq arnasynan kórsetiledi.
Joba Dımash Qudaıbergenniń bastamasymen Hunan Broadcasting System medıaholdıngimen birlesip júzege asyryldy. Voice Beyond Horizon 6 elden kelgen oryndaýshylardyń basyn qosyp, Qazaqstannyń tabıǵı ereksheligi men týrıstik áleýetin halyqaralyq aýdıtorııaǵa tanytýdy maqsat etedi.
Túsirilimder Túrkistan, Mańǵystaý, Almaty jáne Aqmola oblystarynda, sondaı-aq Astana men Almaty qalalarynda ótti. Jobaǵa Qazaqstan, Qytaı, Qyrǵyzstan, Italııa, Malaızııa jáne Serbııa elderiniń ónerpazdary qatysty. 2025 jyldyń qyrkúıek aıynda qatysýshylar Qazaqstan óńirlerin aralap, 7 myń shaqyrymnan astam jol júrip ótken.
Baǵdarlama baǵytyna kóne Túrkistan qalasy, Mańǵystaýdaǵy Bozjyra shatqaly, Kaspıı teńiziniń jaǵalaýy, Qaıyńdy men Kóbeıtuz kólderi, Saty aýyly, Qapshaǵaı sý qoımasy jáne Şýchınsk-Býrabaı kýrorttyq aımaǵy endi.
Kazakh Tourism-niń habarlaýynsha, jobanyń Qytaıdaǵy aýdıtorııasy 1,9 mlrd adamdy qamtıdy.
Jobany uıymdastyrýǵa «Kazakh Tourism» ulttyq kompanııasy, Týrızm jáne sport, Mádenıet jáne aqparat mınıstrlikteri, Astana men Almaty qalalarynyń, sondaı-aq Almaty, Aqmola, Túrkistan jáne Mańǵystaý oblystarynyń ákimdikteri qoldaý kórsetti. Demeýshiler qatarynda «Qarmet», «Qazaqmys», «Altyn Almas» kompanııalary jáne Nurlan Smaǵulov qory bar.
Buǵan deıin Dımash Qudaıbergenniń «Voice Beyond Horizon» halyqaralyq jobasynyń túsirilimderi Túrkistan oblysynda bastalǵanyn habarlaǵan edik.
Ajar Shynybaı, stýdent