Dımashtyń Ispanııadaǵy fanattary 18 myńǵa jetti
ASTANA. KAZINFORM — Dımash Qudaıbergenniń shyǵarmashylyǵy Ispanııanyń bedeldi basylymdarynyń nazaryn taǵy aýdardy. Eldegi eń iri ulttyq gazetterdiń biri — El Mundo jańa sanynyń muqabasyna qazaqstandyq ánshiniń sýretin jarııalap, onyń shyǵarmashylyq joly men halyqaralyq tanymaldyǵyna arnalǵan kólemdi maqala shyǵardy.
Maqala avtory, jýrnalıst Rakel R. Insertıs Dımashtyń Ispanııadaǵy resmı fan-klýbynyń músheleri Marııa Hose, Krıstına, Lıýısa jáne Agýstınmen sóılesken. Olardyń áńgimeleri arqyly basylym Dımashtyń mýzykasy ártúrli jastaǵy jáne túrli salada jumys isteıtin adamdardy qalaı biriktirgenin baıandaıdy. Jankúıerlerdiń aıtýynsha, ánshiniń shyǵarmashylyǵy olardy álemniń ár túkpirine saıahattaýǵa yntalandyryp, Qazaqstannyń mádenıetimen jaqynyraq tanysýyna sebep bolǵan.
Basylym Dımashtyń alǵashqy shyǵarmashylyq jetistikterinen bastap, 2017 jyly Qytaıdaǵy Singer shoýyna qatysýy men odan keıingi halyqaralyq tanymaldyǵyna deıingi jolyna toqtalǵan. El Mundo ánshiniń erekshe vokaldyq múmkindikterin, túrli mýzykalyq janrlarda erkin óner kórsetý qabiletin jáne sheteldegi tyńdarmandarynyń jyl saıyn artyp kele jatqanyn atap ótken.
El Mundo Ispanııadaǵy Dears qaýymdastyǵyna da erekshe nazar aýdarǵan. Basylymnyń málimetinshe, Dımashtyń resmı fan-klýbynda júzdegen adam bar. Al ınternettegi qaýymdastyqtyń sany shamamen 18 myń qatysýshyǵa jetken.
Jankúıerlerdiń bir bóligi Dımashtyń sheteldegi kontsertterine turaqty túrde baryp turady. Olar ánshiniń kontsertteri úshin túrli elderge sapar shegýdi ázildep «Dımash týrızmi» dep ataıdy.
Maqalada rejısser Davıd Kollantestiń Dımashtyń Ispanııadaǵy jankúıerlerine arnalǵan «Al compás de su voz» («Onyń daýys yrǵaǵymen») derekti fılmi de sóz bolǵan.
Fılmde Dımashtyń mýzykasy ártúrli elderden shyqqan adamdardy qalaı jaqyndastyrǵany jáne olardyń ómiriniń mańyzdy bóligine aınalǵany kórsetiledi. Derekti kartınanyń kórsetilimi qyrkúıek aıyna josparlanǵan.
Eske salaıyq, buǵan deıin Dımash DiMENSIONS atty jańa álemdik týrnesin jarııalaǵanyn habarlaǵan edik.
