Dımashtyń halyqaralyq jobasy Qazaqstannyń týrıstik áleýetin tanystyrady

ASTANA. KAZINFORM – Dımash Qudaıbergen men Qytaıdyń Hunan Broadcasting System birlese júzege asyryp jatqan halyqaralyq televızııalyq joba Qazaqstannyń týrıstik áleýetin álemdik aýdıtorııaǵa tanystyrýda. 

Voice beyond Horizon túsirilimi Almaty qalasy men Almaty oblysynyń kórnekti oryndarynda ótti.

Túsirilim barysynda sheteldik kórermenderge sý astyndaǵy qylqan japyraqty ormanymen áıgili Qaıyńdy kóli, BUU Dúnıejúzilik týrıstik uıymy tarapynan álemdegi úzdik týrıstik eldimekenniń biri dep tanylǵan Saty aýyly jáne Qapshaǵaı sý qoımasy kórsetildi.

Almatynyń ózinde túsirilim Arbatta, Kók bazarda jáne metropolıtende júrgizildi.

Jobaǵa Qazaqstan, Qytaı, Qyrǵyzstan, Italııa, Malaızııa jáne Serbııadan kelgen ártister qatysýda. Olardyń ónerin halyqaralyq qazylar alqasy baǵalaıdy.

«Voice beyond Horizon» mýzykalyq jobasy túrli eldiń oryndaýshylaryn biriktirip qana qoımaı, Qazaqstannyń tabıǵı landshaftary men týrıstik tartymdylyǵyn pash etedi. Túsirilim Túrkistan, Mańǵystaý, Almaty jáne Aqmola oblystarynda, sondaı-aq Almaty qalasynda ótti. Jobanyń aqtyq kezeńi Astanada uıymdastyrylady.

Halyqaralyq jobany Týrızm jáne sport mınıstrligi, Mádenıet jáne aqparat mınıstrligi, Kazakh Tourism ulttyq kompanııasy jáne óńirlik ákimdikter qoldap otyr.

Aıta keteıik, latynamerıkalyq jankúıerler Dımashtyń «Angel Love» ánin qazaq tilinde oryndady.