Dımashtyń ata-anasy bala tárbıesindegi basty qaǵıdalarmen bólisti

ASTANA. KAZINFORM — Shańyraq kúnine oraı ánshi Dımashtyń ata-anasy, juldyzdy jup Qanat jáne Sveta Aıtbaevtar Jibek Joly telearnasynyń «Búgin Live» baǵdarlamasynda qonaq boldy. 33 jyl otasqan jup otbasy qundylyqtary týraly oı bólisti.

Olardyń aıtýynsha, úlgili otbasynyń negizi — durys tárbıe men ata-anadan kórgen ónege.

— Bizge óz ata-anamyz úlgi boldy. Olardyń bolmysy, ózara qarym-qatynasy tárbıe mektebi ispetti. Baqytty otbasy bolýymyzǵa sol kisilerdiń eńbegi zor, — dedi ánshi, QR eńbek sińirgen qaıratkeri Qanat Aıtbaev.

Svetlana Aıtbaeva kelin men ene arasyndaǵy baılanystyń mańyzyn atap ótti.

— «Kelin eneniń topyraǵynan» degen sóz beker aıtylmaǵan. Dımash dúnıege kelgende ata-enemiz bizge kómektesý úshin kóship keldi. Bul — úlken qoldaý. Enemiz búginde áýlettiń uıytqysy. Qonaqjaı, meıirimdi, qoly ashyq jan. Úıden qonaq úzilmeıtin úlken shańyraqtyń dástúrin saqtap otyr, — dedi ol.

Efır barysynda bala tárbıesindegi qarapaıym, biraq mańyzdy qundylyqtar da sóz boldy.

— 1994 jyly ájesi Dımashqa palto tigip berdi, al bas kıimin ózim toqydym. Ájesi únemi batasyn berip, jaqsy sóz aıtyp otyratyn. Ol beınejazba áleýmettik jelide de keń taraǵan. «Jaqsy sóz — jarym yrys» degen ras. Oǵan ýaqyt óte kóz jetkizdik, — dedi Svetlana Aıtbaeva.

Óner ıeleri ár balanyń minezi ártúrli bolatynyn, biraq durys tárbıe bárine ortaq negiz qalyptastyratynyn aıtty.

— Úsh balamyz bar. Dımash, Raýshan, Ábilmansurdyń ómirge kózqarasy uqsas bolǵanymen, minezi ártúrli. Dımash — ótkir, qaısar, júregi jumsaq. Raýshan — tııanaqty, jaýapkershiligi joǵary. Mansur — qııalshyl, kitapqumar. Úsheýi úsh bólek bolǵanmen, baýyrmal. Eń bastysy — balanyń júregine baýyrmaldyq pen adamgershilikti sińirý, — dedi Qanat Aıtbaev.

Sonymen qatar ánshi tárbıe berýdegi erkindik pen tártiptiń tepe-teńdigi jaıly aıtty.

— Qytaı halqynda «bala kishkentaı kezinde qatelik jasasa, ol ata-ananyń kemshiligi» degen uǵym bar. Balany júgensiz ósirýge bolmaıdy. Qazaq tárbıesi de osyǵan negizdelgen. «Ákeń kele jatyr» degen sózdiń ózi tártiptiń belgisi. Balany shekten tys erkindikke jibermeı, baǵyt-baǵdar berip otyrý qajet, — dedi ol.

Eske sala keteıik, jaqynda Dımash Qudaıbergen Almatydaǵy mýzeıge atasynyń dombyrasyn syıǵa tartty.