Dımashtyń «AQERKE» áni halyqaralyq jazǵy hıt-paradtyń úzdik úshtigine endi
ASTANA. KAZINFORM – Dımash Qudaıbergenniń «AQERKE» kompozıtsııasy halyqaralyq Channel R Radio radıostantsııasy uıymdastyrǵan #UltimateSummerCountdown jazǵy qorytyndy reıtınginde úshinshi oryn aldy, dep habarlaıdy DimashNews.
Channel R – zamanaýı tanymal mýzyka men jańa mýzykalyq relızderge mamandanǵan, táýlik boıy jumys isteıtin onlaın-radıostantsııa. Ol jarnamasyz habar taratyp, mobıldi qosymshasy, sondaı-aq iHeartRadio, Audacy, TuneIn jáne Apple Music sekildi strımıngtik platformalar arqyly álem tyńdarmandaryna qoljetimdi.
#UltimateSummerCountdown jazǵy reıtıngi jahandyq tyńdarmandardyń daýys berýi negizinde jasalǵan. Qorytyndy tizimge barlyǵy 20 kompozıtsııa endi.
Daýys berý 3 qyrkúıekte aıaqtalyp, onyń nátıjesi 5 qyrkúıekte jarııalandy.
– Daýys berý qorytyndysy boıynsha Dımash Qudaıbergenniń «AQERKE» áni reıtıngte úshinshi orynǵa ıe boldy. Osylaısha, kompozıtsııa Channel R halyqaralyq aýdıtorııasynyń baǵalaýy boıynsha jazǵy maýsymdaǵy eń tanymal úsh ánniń qataryna endi, – delingen aqparatta.
Reıtıngtegi ár kompozıtsııanyń orny Channel R radıosyn álemniń ár túkpirinen tyńdaıtyn aýdıtorııanyń bergen daýystary negizinde anyqtaldy.
Aıta keteıik, Meksıkadaǵy Dears qaýymdastyǵyna Dımash týraly 60 kitap tabystaldy.
