Dımashtyń ánderi Meksıkadaǵy FIFA Fan Fest festıvalinde shyrqaldy
ASTANA. KAZINFORM — 2026 jylǵy FIFA fýtboldan álem chempıonaty aıasynda Qazaqstannyń halyq ártisi Dımash Qudaıbergenniń shyǵarmashylyǵy Sapopan qalasynda (Halısko shtaty) ótken FIFA Fan Fest festıvalinde keńinen nasıhattaldy, dep habarlaıdy dimashnews.com.
FIFA uıymy men shtat úkimetiniń birlesip uıymdastyrýymen ótken bul resmı jankúıerler alańy álem chempıonatynyń eń aýqymdy mádenı-sporttyq keńistikteriniń biri sanalady. Munda alyp ekrandar arqyly matchtar kórsetilip qana qoımaı, mýzykalyq kontsertter, folklorlyq baǵdarlamalar, gastronomııalyq jáne ınteraktıvti alańdar men Meksıkanyń mádenı dástúrlerin tanystyratyn túrli is-sharalar uıymdastyryldy.
Festıvaldiń mádenı baǵdarlamasyna qatysýshylardyń biri – 13 jastaǵy meksıkalyq jas oryndaýshy Anhel Herardo Kovarrýbıas Kabrera (Angeloo). Onyń aıtýynsha, ol Dımash Qudaıbergenniń shyǵarmashylyǵymen on jasynda tanysyp, ánshiniń erekshe vokaldyq sheberligimen qatar, óneri arqyly adamzatqa joldaıtyn rýhanı-adamgershilik qundylyqtarynan erekshe shabyt alǵan.
2025 jyly Angeloo ıspan tilinde oryndaǵan SOS ánimen La Voz Zapopan de los Niños y las Niñas baıqaýynyń jeńimpazy atanyp, osy jetistiginiń nátıjesinde FIFA Fan Fest sahnasynda óner kórsetýge múmkindik aldy. Eki myńnan astam kórermen jınalǵan kontsertte ol Dımashtyń Diva Dance, Sinful Passion jáne When I’ve Got You kompozııatsııalaryn oryndady. Jas ánshiniń óner kórsetýine Dears Jalisco Mexico fan-klýbynyń músheleri qoldaý bildirdi.
- Dımashtyń óneri arqyly jetkiziletin izgi ıdeıalardy kópshilikke nasıhattaý men úshin zor qýanysh. Men onyń shyǵarmashylyǵymen barynsha kóp adamnyń tanysqanyn qalaımyn. Bir kúni ózimen júzdesip, ómirimdi ózgertkeni, shabyt syılaǵany úshin alǵys aıtý – meniń eń úlken armanym, – dep óz oıymen bólisti Angeloo.
Aıta ketelik Dımashtyń Nıý-Iorktegi tarıhı kontserti jaıly derekti fılmi kórermenge jol tartatyny týraly jazǵan edik.
