Dımashtan jas talanttarǵa deıin: qazaqstandyq ónerpazdardyń bıylǵy jetistigi
ASTANA. KAZINFORM — 2025 jyl óner salasy úshin álemdik deńgeıdegi aıtýly oqıǵamen bastaldy. Dımash Qudaıbergen Nıý-Iorktegi Madison Square Garden sahnasynda jeke kontsert berdi. Myńdaǵan aýdıtorııany jınaǵan bul kontsert qazaq óneriniń álemge tanylýyna sebep boldy. Sonymen qatar 2025 jyl jas ónerpazdar úshin de jemisti kezeń boldy. Bul týraly Mádenıet jáne aqparat mınıstrligi málim etti.
Olar álemdegi eń iri mýzykalyq baıqaýlarda óner kórsetip, jeńiske jetti. Atap aıtsaq, Erjan Maksım Dýbaıda ótken Sanremo Best Song – 2025 baıqaýynyń Gran-prı ıegeri, Aleksandr Lım Qazanda ótken XXI «Jańa tolqyn – 2025» konkýrsynyń Gran-prı ıegeri, Almagúl Battalıeva XXXIV «Slavıan bazary» halyqaralyq óner festıvaliniń Gran-prı ıegeri, El Voice toby Stavropolde ótken «Soldier’s Envelope – 2025» halyqaralyq festıvaliniń Gran-prı ıegeri, Almaty oblysy Jambyl aýdany Qaınazar aýyly №1 orta mektebiniń 7-synyp oqýshysy Mıras Naǵashybaı XXIII «Vıtebsk» halyqaralyq balalar mýzykalyq baıqaýynyń jeńimpazy, Jasmın Túzelova Reseıdegi «Golos. Detı» mýzykalyq shoýynyń fınalısi, Ernar Sadyrbaev (Amre) Máskeýde ótken «Intervıdenıe – 2025» halyqaralyq baıqaýynyń fınalısi atandy.
— Maǵan osy kúnge deıin senimin joǵaltpaı, qoldaý kórsetip kele jatqan elime alǵysymdy bildirgim keledi. Kez kelgen jas ónerpaz úshin qoldaý óte mańyzdy. Mádenıet salasyndaǵy áriptesterim de Memleket basshysynyń jan-jaqty qoldaýyn kórip keledi. Bul shyǵarmashylyqqa aıtarlyqtaı áser etedi. Senim men batyldyq artyp, kóp iske qulshynys paıda bolady. Men óz tarapymnan elimizdi odan ári tanyta berýge bar kúsh-jigerimdi salamyn, — dep atap ótti Ernar Sadyrbaev.
Sonymen qatar, bıyl shyǵarmashylyq oqý oryndarynyń stýdentteri arasynan baıqaý jeńimpazdarynyń sany 14,9% artty. Tek 2025 jyldyń ózinde mádenıet salasyndaǵy joǵary oqý oryndary men kolledjderdiń 1511 stýdenti respýblıkalyq jáne halyqaralyq festıvalderdiń laýreattary men dıplomanttary atandy.
Bul jetistikter qazaqstandyq jastardyń álemdik deńgeıde básekege qabiletti ekenin kórsetip qana qoımaı, el namysyn abyroımen qorǵap júrgenin aıqyn dáleldeıdi.
Aıta keteıik, bıyl mádenıet salasynda qandaı aıtýly oqıǵalar bolǵanyn myna siltemeden oqı alasyz.