Dımashqa degen qurmet: Polshada ánshini qarsy alýǵa 10-nan asa eldiń jankúıeri keldi
ASTANA. KAZINFORM — 16 qazanda Qazaqstannyń Halyq ártisi Dımash Qudaıbergen shyǵarmashylyq ujymymen birge Polshanyń Krakov qalasyna keldi, dep habarlaıdy dimashnews.
Aldaǵy jeksenbide dál osy qalada ónerpazdyń jańa DiMENSIONS kontserttik týrnesiniń shymyldyǵy túriledi.
Polsha Dımashty alǵash ret qarsy alyp otyr. Áýejaıǵa ánshini qarsy alý úshin onyń polshalyq fan-klýbynyń músheleri men kontsertke arnaıy kelgen ózge elderdegi jankúıerleri jınaldy.
Shyǵarmashylyq belsendiligimen erekshelenetin polshalyq Dears jankúıerleri ónerpazǵa arnap erekshe qarsy alý baǵdarlamasyn uıymdastyrdy. «Skalne Orły» orkestri qazaqstandyq ánshini Polshanyń dástúrli mýzykalyq týyndylaryn oryndap qarsy alyp aldy. Olardyń qatarynda «Hej bystra woda», «Szła dzieweczka» ánderi men Podhale óńiriniń halyq ánderi de boldy.
Áýejaıda ilingen kórkem bezendirilgen bannerler, túrli elderdiń týlary jáne polshalyq fan-klýbtyń logotıpi beınelengen kıimder kópshiliktiń súıikti ónerpazyn erekshe yqylaspen kútkenin ańǵartyp, jyly ári dostyq atmosfera qalyptastyrdy.
Jankúıerler Dımashty polıak halqynyń dástúrli qonaqjaılyq belgisi sanalatyn nan men tuz usyný rásimimen qarsy aldy.
Búgin áýejaıǵa Polsha, Qazaqstan, Frantsııa, Rýmynııa, Ispanııa, Japonııa, Italııa, Kanada, Aýstralııa, Germanııa jáne basqa da elderden kelgen jankúıerler jınaldy.
Al 18 qazanda Krakov qalasyndaǵy TAURON Arena sahnasynda Dımash Qudaıbergenniń jańa DiMENSIONS kontserttik týrnesiniń saltanatty ashylýy ótedi.
Buǵan deıin Dımash Qudaıbergen sheteldikterdiń qazaq mádenıetine qyzyǵýshylyǵy artqanyn aıtty.
