Dımashqa arnalǵan erekshe LEGO-portret: ánshi jas avtorlarǵa alǵys aıtty
ASTANA. KAZINFORM — Dımash Qudaıbergen Aqtóbede ártistiń ózine arnalǵan aýqymdy LEGO-portretti jasaǵan oqýshylarmen kezdesti, dep habarlaıdy dimashnews.
Dımash Qudaıbergen shyǵarmashylyq issaparmen Aqtóbe qalasyna bardy. Óner ıesi «Shuǵyla» balalar lagerine baryp, ózine arnalǵan kólemdi LEGO-jobany júzege asyrǵan oqýshylarmen júzdesti.
Dımash jobaǵa qatysqan bes oqýshyǵa alǵys retinde atalǵan lagerge joldama tartý etti. Tabıǵat aıasyndaǵy taza aýa, sporttyq belsendi is-sharalar, tájirıbeli tálimgerler men dostyqqa negizdelgen atmosfera balalardyń demalysyn este qalarlyqtaı etedi degen senim bildirildi.
Jobanyń ıdeıasy mekteptegi robototehnıka úıirmesi aıasynda týyndaǵan. Oqý jylynyń sońynda oqýshylar dástúrli túrde qorytyndy jumystaryn usynatyn bolsa, bul joly jeke emes, ujymdyq joba ázirleý jóninde sheshim qabyldanǵan. Ideıa bastamashysy, pedagog Janaly Maqattyń aıtýynsha, oqýshylarǵa shabyt beretin, úlgi tutatyn tulǵa retinde Dımash Qudaıbergenniń beınesi tańdalǵan.
— Dımash Qudaıbergenmen bir aýdanda óskendikten, onyń shyǵarmashylyq jolyn jaqsy bilemin. Sondyqtan oqýshylarǵa osyndaı úlken portret jasaý týraly usynys bildirdim. Bul ıdeıa balalar tarapynan zor qyzyǵýshylyq týdyrdy, — dep atap ótti robototehnıka úıirmesiniń jetekshisi.
Joba tórtinshi synyp oqýshylarymen birlesip júzege asyryldy. Jumys bastalmas buryn oqýshylar ánshiniń ómirbaıany men shyǵarmashylyq jetistikterimen tanysyp, bolashaq kompozıtsııanyń nobaıyn ázirlep, LEGO-nyń konstrýktsııasyn josparlady. Negizgi jumystardy pedagogterdiń jetekshiligimen oqýshylar ózderi jasady.
Jobany júzege asyrý barysynda mektep qoryndaǵy materıaldar paıdalanylyp, jetispeıtin LEGO bólshekteri Aqtóbe qalasyndaǵy «Keleshek» mektepteri jelisi men qalalyq bilim bóliminiń qoldaýymen qamtamasyz etildi.
Uıymdastyrýshylardyń aıtýynsha, joba muqııat úılestirý men resýrstardy naqty josparlaýdy talap etken. Nátıjesinde eni shamamen 1,5 metr, uzyndyǵy 2,5 metr bolatyn kólemdi kompozıtsııa jasaldy.
Jobany iske asyrýǵa shamamen bir apta ýaqyt jumsaldy. Oqýshylar pedagogterdiń baǵyt-baǵdar berýimen bólshekterdiń ornalasý oryndaryn belgilep, qurylym elementterin júıelep, keıin olardy birlese qurastyryp, túzetýler engizip otyrdy. Bul uzaq ýaqyt pen asa uqyptylyqty qajet etken eńbek boldy.
Pedagogterdiń pikirinshe, mundaı jumys balalardyń motorıkasyn, zeıini men toppen jumys isteý daǵdylaryn damytýǵa erekshe yqpal etedi.
Budan buryn Dımash týǵan jeri Aqtóbede klıp túsiretinin jazǵanbyz. Sonymen qatar ánshi ózi oqyǵan mektebine baryp, ustazdaryn qýantqany habarlandy.
