Dımash jeke kontsertine jańa ánder jazyp jatyr - Aıman Musaqojaeva
"Qazirgi kezde ol Hunan TV stýdııasynda jańa ánderin jazýda. Biraq qandaı ánder jáne kimniń jazǵany týraly ázirshe aıta almaımyz. Negizi jańa ándi jazý ońaı emes qoı. Kontsertke bir aı ýaqyt qaldy. Dımashtyń júrekke jaqyn ánderdi oryndaıtynyn bilemiz. Sonyń bárin jeke kontsertinde tyńdaı alasyzdar. Jalpy oǵan repertýardy únemi jańartyp otyrý qajet. Ol shyǵarmashylyq úshin, ánshi retinde ósý úshin kerek", - dedi A. Musaqojaeva jýrnalısterge bergen suxbatynda.
Onyń aıtýynsha, kontsertte Dımashpen birge án aıtatyn estrada juldyzdary áli anyqtalǵan joq. Degenmen, aǵaıyndy Meladze, Lara Fabıan, sondaı-aq qazaqstandyq ánshilermen kelissózder júrip jatyr. "Árıne, "I am Singer" baıqaýynda Dımashpen birge óner kórsetken ánshilerdiń kelgenin de qalar edik. Sebebi olar birge de, bólek te án aıta alady. Baıqaý ánshileriniń Qazaqstanǵa kelý-kelmeýine qatysty naqty eshteńe aıta almaımyn. Degenmen, qytaılyq juldyzdardyń Hunan TV-men kelisimderi bar ekenin eskersek, kontsertke olardyń da kelýi bek múmkin", - dep atap kórsetti ýnıversıtet basshysy.
Aıta keteıik, buǵan deıin mınıstr Arystanbek Muxamedıuly da Dımashtyń kontserti jaıynda aıtqan bolatyn. "Biz qytaılyq Hunan TV arnasymen kelisimshartty rásimdedik. Shoý óte qyzyqty bolady. Sebebi oǵan úzdik rejısserler tartylýda. Qazirgi kezde biz estradalyq-sımfonııalyq orkestrdi jasaqtadyq. Dırıjerdi de anyqtap qoıdyq. Al Dımashpen birge án aıtatyn ártister týraly ázirge eshteńe aıta almaımyn. Óıtkeni kelisimshart talaptary naqtylanýda", - dedi Muxamedıuly búgin jýrnalısterge bergen suxbatynda.
