Dımash jankúıerlerine qytaı tilinde alǵys aıtty

ASTANA.QazAqparat - Dımash Qudaıbergen jankúıerlerine qytaı tilinde óz qolymen jazǵan hatty oqyp berdi, dep habarlaıdy QazAqparat tilshisi.

Ánshi hatty qytaı tilinde jazýǵa kóp kúsh salǵanyn jasyrmady. Sondaı - aq,  bul sózderdi jankúıerlerine burynnan aıtýdy oılap júrgen.

«Qurmetti meniń dostarym! Mýzyka álemi bizdi tabystyrdy. Qytaıǵa kelgen qysqa ǵana bes aıda, meniń ómirimde úlken ózgeris boldy. Sebebi senderdiń bar bolǵandaryń meni baqytqa bóleıdi. Basqa tilde sóılesek te, men mýzyka arqyly senderge meniń ishki álemimdi jetkizsem deımin. 23 jasqa kelgen men, tipti de qulshynyp, sender jaqsy kórýge jáne maqtan tutýǵa laıyq Dımash bolýǵa tyrysamyn. Senderdiń ystyq yqylastaryńa rahmet, men senderdi súıemin!», - dep jazylǵan hatta.

Aıta keteıik, Qytaı astanasy Beıjiń qalasynda qazaqstandyq ánshi Dımash Qudaıbergenniń qytaılyq jankúıerlerge arnalǵan «Tosyn syıǵa toly týǵan kún» atty án keshi  ótýde. Jas talanttyń Qytaıdaǵy jankúıerleri qytaıdyń bas qalalary jáne Astana qalasyndaǵy LED ekrandarda týǵan kún quttyqtaýlaryn joldady. Keshte arnaıy úlken ekrannan qytaılyq tanymal ánshilerdiń de beıne quttyqtaýlary kórsetildi.