Dımash jankúıerleri Qazaqstan halqyn Birlik kúnimen quttyqtady
ASTANA. KAZINFORM – 1 mamyr – Qazaqstan halqynyń birligi kúnine oraı «Jibek Joly» radıosynyń tikeleı efırinde erekshe kezdesý ótti. Álemdik deńgeıdegi juldyz Dımash Qudaıbergenniń ata-anasy qatysqan baǵdarlamada Meksıka, Polsha jáne Argentınadan baılanysqa shyqqan jankúıerler qazaqstandyqtardy merekemen quttyqtap, Dımash fenomeniniń halyqaralyq dostyq kópirine aınalǵanyn dáleldedi.
Ánshiniń ákesi Qanat Aıtbaev ulynyń repertýaryndaǵy «Bir aspannyń astyndaǵy tarıh» atty 10 mınýttyq rekvıem-shyǵarmasynyń tereń maǵynasyna toqtaldy.
Onyń aıtýynsha, bul týyndy tek vokaldyq kúrdeliligimen emes, adamzattyń ortaq muńy men izgi tilegin biriktirýimen qundy.
– Bul án oryndalǵan kezde ár eldegi adamzattyń izgiligi de, ishki muńy men qaıǵysy da bir ekenin kóremiz. Tyńdarmandar oryndarynan turyp, uzaq ýaqyt qol soqqanda, barlyq adamnyń júregindegi armany – beıbitshilik ekenin sezinemiz. Bir aspannyń astyndaǵy tarıhymyz tek qana jaqsylyqqa aýdarylsyn degen oıymyz bar, – dedi Qanat Aıtbaev.
Merekelik efırge shet elderden Dımashtyń ónerine tánti jandar qosylyp, jyly lebizderin bildirdi.
– Onyń mýzykasyn baǵdarlamamda qosqan saıyn kórermenderim tańǵalyp, biz birden jelide trendke aınalamyz. «Dears» – men tanyǵan eń ádemi ári syılastyqqa toly fan-klýbtardyń biri. Meksıkadan Qazaqstan halqynyń birligi kúni qutty bolsyn! Men sizderdi jaqsy kóremin! I love you, guys, – dep Meksıkalyq radıo jáne telejúrgizýshi Pancho Hose sálem joldady.
Al Argentınadan baılanysqa shyqqan Paola Profeta Dımash arqyly tutas bir otbasynyń Qazaqstanǵa ǵashyq bolǵanyn jetkizdi, tipti, Argentınada Dımashqa arnalǵan 24/7 rejıminde jumys isteıtin onlaın radıo ashqan.
– 2019 jyly Dımashqa kezdeısoq tap boldym. Anam, balalarym – úsh býyn onyń daýysyna tánti boldyq. Sodan keıin onyń qaı elden ekenin zerttep, ásem el – Qazaqstandy tanydyq. Biz onyń mádenıetine, ónerine ǵashyq boldyq. Radıo qurýdaǵy maqsatym – Argentına men Qazaqstan arasyndaǵy mádenı almasýdy nasıhattaý. Argentınadan sizderge úlken mahabbatpen sálem joldaımyn! Alǵa, Qazaqstan, – dedi Paola Profeta.
Eske sala keteıik, Argentınada Dımashtyń qurmetine mýzykalyq kabınet ashylǵan bolatyn.
