Dımash úıleri sýdyń astynda qalǵan halyqqa kómektesýge shaqyrdy
ASTANA. KAZINFORM - Qazaqstandyq ánshi Dımash Qudaıbergen el azamattaryn sý basqan óńirlerge kómek qolyn sozýǵa úndedi.
Ol bul jaıynda Instagram paraqshasynda jazdy.
— Naýryzdyń sońǵy kúnderi kún kúrt jylynyp, Aqtóbe oblysy aımaǵynda jáne elimizdiń taǵy birqatar óńirinde tez erigen qar sýy saı-salany lezde toltyryp, avtokólik joldaryn shaıyp, birneshe eldimekendi sý basypty. Kóp otbasylardyń baspanasy turýǵa jaramsyz bolyp qalǵan. Sondaı-aq Aqtóbe aımaǵynda ózenderdegi muz erip, sý qoımalaryndaǵy sý deńgeıiniń kóterilip, ózenderdiń arnasynan asý qaýpi joǵary eken. Munyń sebep-saldaryn quzyrly mekemeler anyqtap, máseleniń túıinin sheshý joldaryn izdestire jatar. Memleket tarapynan úılerin sý shaıyp ketip, dalada qalǵan aǵaıynǵa tolyqqandy kómek kórsetiletinine senim mol, - deıdi qabyrǵasy qaıysqan oryndaýshy.
Dımash Qudaıbergen tap qazirgi sátte qınalǵanǵa qol ushyn sozý — eń basty paryz ekenin eske saldy.
— «Ot pen sý — tilsiz jaý». Sondyqtan qysyltaıań sátte baýyrlarymyzǵa qol ushyn sozyp, birligimizdi kórseteıik, aǵaıyn! - dep qaıyrymdylyqqa úndedi ánshi.
