Dımash úshin óz elinen ystyq jankúıer joq - Alpamys Sherimov
ASTANA. QazAqparat - Ánshi Dımash Qudaıbergen ázirshe buqaralyq aqparat quraldaryna eshqandaı da suhbat bere almaıdy. Óıtkeni, Dımashtyń Qytaıdaǵy kelisimsharty áli aıaqtalmaǵan. Bul týraly ánshiniń resmı ókili Alpamys Sherimov málim etti, dep xabarlaıdy QazAqparat tilshisi.
"Ókinishke qaraı, kelisimniń qaı ýaqytta aıaqtalatynyn aıta almaımyz. Al xalyqtyń aldyna onsyz da shyǵyp júr ǵoı. Jýrnalısterdiń suraqtary bolsa, ázirshe men barlyq saýaldarǵa jaýap bere alamyn", - dedi Sherimov QazAqparat tilshisine bergen suxbatynda.
Alaıda ol ánshiniń jeke oılaryna, Qytaıdaǵy estelikteri men baıqaýdan alǵan áserine qatysty suraqtarǵa tek Dımashtyń ózi ǵana jaýap bere alatynyn moıyndady. Al "Qytaıdaǵy úlken konkýrstan keıin Qazaqstandaǵy jankúıerlerdiń azdyǵy sezilip qalǵan joq pa?" degen suraqqa ózi jaýap berip kórdi: "Joq, jankúıerlerdiń azdyǵy sezilgen joq. Qazaqstan xalqy Assambleıasynyń kontsertin kórdińizder, onyń aldynda Dımashqa "Qazaqstan" kontsert zalynda qurmet kórsetti. Soǵan qaraǵanda, jankúıerler az bolyp qaldy dep aıta almaımyn. Dımash qaıda barsa da, ol úshin óz elinen artyq, óz jankúıerinen ystyq adam joq qoı", - dep atap kórsetti Dımashtyń resmı ókili.
Onyń aıtýynsha, qytaılyq jankúıerler bergen barlyq syılyqtar Qazaqstanǵa jetkizildi. Sonyń ishinde Dımashqa jasalǵan eń qymbat ári tosyn syı - ol Djekı Chanmen kezdesý. Álemge áıgili akterdyń qolynan eksklıýzıvti kúrtesheni alý da Dımash úshin úlken syı boldy. Qazirgi kezde Dımash qytaı tilin de úırenip jatyr.
"Ol aǵylshyn, qytaı tilderin meńgerip jatyr. Óıtkeni ol baıqaýda qytaısha ǵana emes, aǵylshyn tilinde de, frantsýz tilinde de, ıtalıan tilinde de án aıtty", - dedi Alpamys Sherimov.
