Dımash tyńdarmandary Argentınada Qazaqstan qurmetine monýment ornatady
ASTANA. KAZINFORM — Argentınanyń Rosarıo qalasyndaǵy Qazaqstan alańynda bıiktigi alty metrlik Alma del Río monýmenti ornatylady. Bul biregeı sáýlet óneri — 2019 jyldan beri baýyrlas qala atanǵan Almaty men Rosarıo arasyndaǵy erekshe baılanys pen dostyqtyń sımvoly.
Eskertkish jobasyn Latyn Amerıkasyndaǵy Qazaqstan mádenı ortalyǵynyń dırektory Irına Vagner tanystyrdy.
Tanystyrylymy Devıs kýbogyndaǵy Qazaqstan men Argentına matchyna arnalǵan baspasóz konferentsııasynda ótti.
Irınanyń aıtýynsha, mozaıka ispettes shaǵyn keramıkalyq elementtermen qaptalǵan bul eskertkish — búkil álemdegi birlik, dostyq pen beıbitshiliktiń sımvoly.
Eskere ketetin taǵy bir jáıt, bul eskertkishtiń árbir bóligi Dımashtyń jankúıerleriniń qaıyrymdylyq jınaǵynyń arqasynda jasalady.
Osy syı arqyly Dımashtyń jankúıerleri tatýlyq men Dımashqa degen adal súıispenshiliginiń sheksiz ekenin taǵy bir márte dáleldedi.
Eskertkishtiń jobasyn áıgili argentınalyq sýretshi-músinshiler Gýstavo Aýgsbýrger men Danıel Kosık jasaǵan.
Osy oraıda, monýmenttiń ataýy Alma del Río qazaqshaǵa «Ózenniń jany, rýhy» dep aýdarylsa, ekinshi qyzyqty derek: «Alma» — Almaty jáne «Río» — Rozarıo qalalarynyń alǵashqy-sońǵy býyndarynan alynǵan.
Eskertkishtiń ashylýy 2024 jyldyń 16 jeltoqsanynda Qazaqstannyń Táýelsizdik kúnine oraı josparlanyp otyr.
Sonymen qatar, baspasóz konferentsııasynda ıspan tilinde sóıleıtin jandarǵa arnalǵan qazaq tiliniń tuńǵysh oqýlyǵy da tanystyryldy.
Bul oqýlyq taıaýda birneshe elde qoljetimdi bolady.
