Dımash syndy adamdar jasandy ıntellektini qoldanbaıdy — WIPO bas dırektory
ASTANA. KAZINFORM — Generatıvti jasandy ıntellekt adamdy almastyra almaıdy. Mundaı pikirdi Astana halyqaralyq forýmy aıasynda ótken «Jasandy ıntellekt dáýirindegi zııatkerlik menshik» sessııasynda Dúnıejúzilik zııatkerlik menshik uıymynyń (WIPO) bas dırektory Daren Tang aıtty.
— Keıbireýler Qazaqstandy bilmeýi múmkin. Biraq, Dımashty anyq biledi. Ol — tańǵajaıyp ánshi. Tańǵalarlyq oktavada án salady. Dımash syndy adamdar jasandy ıntellektini qoldanbaıdy. Olar qazaqtyń dástúrli mýzykalyq aspaptaryn paıdalanady. Óz daýysymen óner kórsetedi. Bul saladaǵy keı adamdar jasandy ıntellektini anıme syndy dúnıeler jasaýǵa qoldanýy múmkin. Zııatkerlik menshik damyp, dástúrli jasandy ıntellekti men zamanaýı tehnologııalardy biriktirip otyr, — dedi ol.
Onyń aıtýynsha, oqytý tili jáne jasandy ıntellekt jasaıtyn dúnıeler sońǵy 20-30 jylda damı tústi.
— Sondyqtan barynsha abaı bolǵan jón. Bul tehnologııalardy jańa dúnıe retinde qaraýdyń reti joq. Adamdy almastyratyn Qudaı syndy qarastyrý da jónsiz. Generatıvti jasandy ıntellekt adamdy almastyra almaıdy. Árıne, ol adamdy kreatıvtilikke úıretýi múmkin. Máselen, generatıvti jasandy ıntellekt Pıkassony almastyrýy múmkin emes. Sol sebepti generatıvti jasandy ıntellektini qural retinde ǵana qarastyrýǵa tıispiz. Keıbireýler maǵan «jasandy ıntellekti túbegeıli ózgerdi, bizdiń ornymyzdy basady» dep jatady. Menińshe, onyń aýyly áli alys, — dedi Daren Tang.
Aıta keteıik, elordada Astana halyqaralyq forýmy ótip jatyr. Forýmǵa 7 000-nan astam qatysýshy tirkelgen. Eýropa, Ortalyq Azııa, Taıaý Shyǵys pen Afrıka elinen BUU, AAU, HKU jáne DZMU sııaqty jetekshi halyqaralyq uıymdardyń atynan 160-tan astam spıker shaqyrylǵan.
Іs-sharany ashqan Qasym-Jomart Toqaev elimiz SryptoCity dep atalatyn jańa pılottyq jobany júzege asyrýdy josparlap otyrǵanyn, Qazaqstan BUU Qaýipsizdik Keńesiniń quramyn keńeıtýdi qoldaıtynyn aıtty.