Dımash Reseıde taǵy bir jańa ániniń tusaýyn kesti

NUR-SULTAN. QazAqparat – Dımash Qudaıbergen Reseı Federatsııasynyń Sochı qalasyndaǵy «Novaıa volna 2021» festıvalinde «Fly away» («Jyraqqa ushamyn») atty jańa kompozıtsııasyn tanystyrǵan bolatyn. Dimashnews resýrsy jańa týyndynyń shyǵý tarıhy týraly maqala jarııalady, dep habarlaıdy QazAqparat tilshisi.

Saıttyń jazýynsha, ánniń sazyn kompozıtor Ediljan Ǵabbasov shyǵarǵan.

Al sózin Djordan Arakelıan jazǵan. Mátinniń avtory Dımashtyń bek-vokalısi bolyp ta jumys isteıdi.

Mýzyka ındýstrııasynda 20 jyldan astam tájirıbesi bar Ediljan Ǵabbasov ánniń sazy erekshe bir shabytty shaqta týǵanyn aıtady.

«Bir kúni keshki tynyshtyqta shabyt kelgenin sezindim. Mıymda kenet bir áýen paıda boldy. Yńyldap aıta bastap edim, sanama Dımashtyń úni jetti. Sol sátte-aq, bul ándi Dımash shyrqasa degen oı keldi», - dep eske alady kompozıtor.

Buǵan deıin Dımashtyń «Give Me Your Love», «Be With Me» sııaqty hıt ánderiniń sózin jazǵan Djordan Arakelıan bul joly da mátinniń negizgi mazmunyn ánshiniń ózi tańdaǵanyn aıtady.

«Dımash sóz jazǵyzar kezde astarynda qandaı oı jatýy kerektigin aldyn ala aıtady. Bul jaǵyna ol qatty mán beredi. Keıde tipti jańa kompozıtsııanyń demo-nusqasyn eshbir mátinsiz-aq shyrqaǵan kezdiń ózinde úninen aıtqysy kelgen oıy menmundalap turǵandaı sátter bolady. «Fly away» kompozıtsııasy – rýhanı, shyǵarmashylyq erkindik pen oı azattyǵy týraly án», - deıdi D.Arakelıan.