Dımash pen Danelııa The World's Best shoýynyń ekinshi raýndynda kimdermen baq synaıdy

ASTANA. QazAqparat - Amerıkanyń The World's Best shoýyna qatysyp jatqan qazaqstandyq ánshiler Dımash Qudaıbergen men Danelııa Tóleshova ekinshi raýndta óner kórsetedi, dep habarlaıdy QazAqparat tilshisi.

Eske sala keteıik, «The World's Best» shoýynyń ekinshi epızodynyń qorytyndylary boıynsha Dımash 100-den 98 upaı jınaǵan bolatyn.

Ánshi birinshi raýndta ánsúıer qaýymnyń qulaǵynyń quryshyn qandyrǵan S.O.S d'un terrien en détresse kompozıtsııasyn oryndady.
Al 12 jastaǵy Danelııa Tóleshova ánshi Andra Day-diń Rise up kompozıtsııasyn oryndady.

Eske sala keteıik, jas daryn ıesi osy ánmen Ýkraınadaǵy «Golos. Detı» shoýynda tyńdarmandaryn tánti etken bolatyn.
Amerıkan shoýynyń birinshi raýndynda Danelııa 100 upaıdyń 96-syn enshiledi.

«The World's Best» án baıqaýynyń YouTube vıdeohostıngindegi resmı arnasynda Dımash pen Danelııanyń ekinshi raýndta kimdermen óner jarastyratyny týraly vıdeo jarııalandy.



Onda Dımashqa ıtalııalyq ánshi Krıstına, al Danelııaǵa Japonııa ókili, skrıpkashy Manamı qarsylas bolatyny aıtylǵan.



Avtory: Kamıla Ámirova