Dımash pen Danelııa amerıkalyqtardy qaıran qaldyrdy - prodıýser Gaýhar Nurtas
Sanaýly kúnderden keıin CBS telearnasynda The World's Best jahandyq talanttar shoýy bastalady. Oǵan Qazaqstan atynan Dımash pen Danelııa alǵash ret qatysady. Sonymen birge, ádil qazy alqasynyń quramynda qazaqstandyq prodıýser, rejısser Hollywood Film Academy ® kompanııasynyń negizin qalaýshy Gaýhar Nurtas bar.
Úmitkerlerdi basty úsh tóreshi - Drıý Berrımor, Rý Pol jáne Feıt Hıll, sonymen birge halyqaralyq sarapshylar toby baǵalaıdy. Otandasymyz Gaýhar Nurtas dál osy halyqaralyq toptyń quramyna engen.
Gaýhardyń aıtýynsha, joba túsirilimi áli jalǵasýda, alǵashqy 10 epızod 3 aqpannan bastap CBS telearnasynda kórsetile bastaıdy.
«CBS telearnasy kásibı tájirıbesi bar, sarapshy bola alatyn adamdarǵa izdeý saldy. Shoý uıymdastyrýshylary Qazaqstan konsýldyǵyna habarlasqanda meniń aty-jónimdi estigen. Joba týraly aqparat eshkimge aıtylmaǵan. Shoý bolatynyn eshkim bilgen joq. Kútpegen jerden uıymdastyrýshylar maǵan habarlasyp, jobaǵa 50 sarapshynyń biri retinde Qazaqstan atynan qatysýdy ótindi», - deıdi Gaýhar Nurtas.
Buǵan deıin G. Nurtas televızııalyq jobada qazylyq etip kórmegen. Alaıda, ol aýqymdy jobalar men festıvalderge prodıýserlik etkenin, qazylar alqasyn tańdaýda tájirıbesi bar ekenin atap ótti.
«Biraz jyldan beri Amerıkada turamyn jáne Danelııa meni tań qaldyrdy. Onyń kásibı deńgeıi joǵary jáne daýsy zor. Danelııa bolashaqta úlken juldyzǵa aınalady. Barlyq sarapshylar osyndaı pikir aıtty. Dımashqa kelsek, ony bári tanıdy, jaqsy kóredi. Dımashty jandy daýysta tyńdaǵan tipti áserli eken. Kórermenderge onyń talanty erekshe unady», - dedi ol.
Gaýhar Nurtas Amerıkada uzaq jyl turyp, Qazaqstan týraly durys kózqaras qalyptastyrýǵa tyrysqanyn jetkizdi.
«Elimizdi tanytatyn úlken múmkindik týdy. Endi álem jurtshylyǵy Qazaqstandy talanttar eli retinde tanıdy», - deıdi prodıýser.
Sonymen birge, ol aldaǵy josparlarymen bólisip, jańa jobalary jóninde aıtyp berdi. Amerıkalyq talanttar shoýynan bólek, G. Nurtas Mońǵolııamen birlesip, ekshn-fılmge prodıýserlik etýde. Atalǵan fılm bıyl qazaqstandyq kınoprokatqa shyǵady.
