Dımash óz ánin qazaq jáne qytaı tilinde oryndady

ASTANA.QazAqparat - Qytaıdyń «Singer 2017» án baıqaýyna qatysyp jatqan qazaqstandyq ánshi Dımash Qudaıbergen onynshy kezeńde O.Baıseńgirdiń sózine jazylǵan óz áni «Umytylmas kún» ánin qazaq jáne qytaı tilinde oryndap, úshinshi orynnan kórindi, dep habarlaıdy QazAqparat.

Buǵan deıin habarlaǵanymyzdaı, 10 kezeńnen turatyn baıqaýdyń irikteý kezeńi óz máresine jetti. Jobanyń bastapqy úsh ánshisi D.Qudaıbergen, Lion jáne Sandy aqtyq synǵa tikeleı joldama aldy. Al 23 naýryz kúni bolyp ótken «jubatý» básekesine baıqaýdan shyǵyp qalǵan 10 ánshi qatysyp, onyń tek 7-eýi fınalǵa shyqty. Osylaısha baıqaýdyń eki kezeńnen turatyn aqtyq básekesine 10 ánshi joldama aldy.



Aıta keterligi, Dımash irikteý kezeńderinde tórt ret birinshi oryn alyp, jalpy esepte kósh bastap tur. Fınal 8 jáne 15 sáýir kúni ótetin bolady.