Dımash Nıý-Iorktegi kontserti týraly derekti fılm daıyndap jatyr
ASTANA. KAZINFORM — 5 qazanda Nıý-Iorkte Dımashtyń jeke kontserti ótti. Madison Square Garden kórermenderi Dımash Qudaıbergenniń qoıylymyn ystyq yqylaspen qabyldady, dep habarlaıdy Dimashnews.
— Myńdaǵan júrek. Bir dem. Bul tún tarıhta da, meniń júregimde de máńgi qalady. Osy armandy menimen bólisken meniń komandama, mýzykanttarǵa, kórermender men osy saparǵa senim artqan árbir janǵa alǵysym sheksiz. Mýzyka bizdi biriktirip, sonyń nátıjesinde Qazaqstannan Amerıkaǵa deıin, júrekten júrekke, jannan janǵa jeteledi, — dep jazdy Dımash Instagram-daǵy paraqshasynda Nıý-Iorktegi kontsertinen keıin.
Sol keshtiń fınalynda Dımash óziniń avtorlyq týyndysyn — úsh jyldan astam ýaqyt boıy jazylǵan, tórt iri konfessııanyń mýzykalyq jáne tarıhı elementteri toǵysqan shyǵarmasyn oryndap berdi.
Bul kompozıtsııa «Stranger» týrynyń alǵashqy kúninen, ıaǵnı 2022 jyldyń 23 qyrkúıegindegi Almatyda ótken shoýdan bastap Dımashtyń turaqty repertýaryna engen. Sodan beri árbir kontsert saıyn oryndalyp, kórermenderdiń júreginen jol taýyp keledi.
Madison Square Garden zalyndaǵy kórermender Rekvıemdi kózderinde jas alyp, qoldaryn júrekterine qoıǵan kúıi oryndarynan tik turyp qarsy aldy. Bes, on, on bes mınýt boıy eshkim ornyna otyrmady.
Keıin Dımash jankúıerlerine arnaǵan úndeýinde Nıý-Iorktegi osy kontsert týraly «Armandardyń tarıhqa aınalǵan sáti» atty derekti fılm daıyndap jatqanyn habarlady.
Budan buryn habarlanǵandaı, 6 qazan kúni Mehıko áýejaıynda qazaqstandyq ánshi Dımash Qudaıbergendi jankúıerleri qarsy aldy. Álemge áıgili qazaqstandyq ánshi alǵash ret Meksıkada jeke kontsert berý úshin bardy.