Dımash Nıý-Iorkte qazaq mádenıetin damytatyn uıymdarmen kezdesti
ASTANA. KAZINFORM — Qazaqstannyń Nıý-Iorktegi Bas konsýldyǵynda álemge áıgili qazaqstandyq oryndaýshy Dımash Qudaıbergenniń mádenıet salasynyń ókilderi, sondaı-aq AQSh-ta qazaq mádenıeti men mýzykasyn belsendi nasıhattap júrgen uıymdardyń ókilderimen kezdesý ótti.
Syrtqy ister mınıstrligi atap ótkendeı, is-shara shetelde qazaqstandyq mádenı bastamalardy qoldaý men baılanystardy nyǵaıtý jolyndaǵy mańyzdy qadam boldy. Kezdesý barysynda Qazaqstannyń mýzykalyq jáne mádenı murasyn halyqaralyq deńgeıde tanytýǵa baǵyttalǵan jobalar, sondaı-aq amerıkalyq mádenı ınstıtýttarmen yntymaqtastyqty damytý josparlary talqylandy.
Kezdesýde Qazaqstan men Amerıka arasyndaǵy mádenı jáne iskerlik yntymaqtastyqty damytýǵa aıryqsha úles qosyp júrgen Soltústik Amerıkadaǵy Qazaqstan mádenı jáne iskerlik qaýymdastyǵynyń (Kazakhstan Cultural-Business Association of North America, KCBANA) qyzmeti erekshe atalyp ótti.
Sonymen qatar Fıladelfııa qalasyndaǵy mýzyka professory Vladımır Deniń eńbegi joǵary baǵalandy. Ol Qýat Shildebaev, Ǵazız Jubanov, Evgenıı Brýsılovskıı syndy qazaq kompozıtorlarynyń shyǵarmashylyǵyn júıeli túrde nasıhattap, Qazaqstannyń mádenı beınesin shetelde nyǵaıtýǵa baǵyttalǵan jobalardy belsendi qoldap keledi.
Kezdesý mádenı uıymdar, dıaspora jáne shyǵarmashylyq qaýym ókilderiniń kúsh biriktirýiniń mańyzdylyǵyn aıqyndap, mádenı dıplomatııa elder arasyndaǵy ózara senim men dostyqty nyǵaıtýǵa shynaıy berilgen adamdardyń eńbegi arqyly júzege asatynyn taǵy bir márte kórsetti.
2025 jylǵy 5 qazanda Dımash Qudaıbergen Nıý-Iorktegi áıgili «Madison Square Garden» sahnasynda óner kórsetip, osy ańyzǵa aınalǵan álemdik arenada jeke kontsertimen shyqqan tuńǵysh qazaqstandyq boldy.
Budan buryn Dımash Qudaıbergendi jankúıerleri Nıý-Iorkte qoshemet kórsetip qarsy alǵanyn jazǵanbyz.