Dımash Nııazov elirgen qarsylasyn sabasyna túsirdi
ASTANA. QazAqparat - Nıý-Iorktyń úzdik polıtseıi, Shymkenttiń týmasy - Dımash Nııazov (11-0-3, 5KO) týǵan jerindegi alǵashqy jekpe-jegin jeńispen aıaqtady. Sóıtip, kúni keshe tóbeles izdegen qarsylasy - Edýardo Pereırany (22-4-0,18 KO) sabasyna túsirdi, dep xabarlaıdy QazAqparat tilshisi.
Birinshi raýndta eki boksshy baıaý qımyldap, bir-birin ábden barlady. Degenmen, brazılııalyq boksshy keıingi raýndtarda da óz ustanymyn ózgertken joq.
Dımash Nııazov bolsa, shıraq qımyldady. Djebterin ońaı jetkizip, serııalyq soqqylaryn da daryta bildi. Edýardo Pereıra qazaqtyń Dımashyn yǵystyryp, qysym jasap kórdi. Alaıda «Nıý-Iorktyń úzdik polıtseıi» qarsylasynyń barlyq shabýyldaryna sheber jaýap berip, qarymta soqqylar jasap otyrdy. Al altynshy raýndta Pereırany bir-eki ret eseńgiretip tastady. Jankúıerler nokaýt kóre almasa da, Dımash upaı sanymen jeńip, ózine artylǵan úmitti aqtady.
«Barlyǵyna alǵysymdy aıtamyn. Sál jaraqat aldym, eń bastysy, amanmyn. Jankúıerlerime unasam, Qazaqstanǵa jıi kelip, jekpe-jekterimdi ótkizýge daıynmyn», - deıdi Dımash Nııazov.
Aıta keteıik, keshegi salmaq ólsheý rásimi kezinde Dımash Nııazov óz qarsylasymen tóbelesip qala jazdady. Edýardo Pereıra kóz arbasyp turǵanda iligise ketti. Biraq Dımash óziniń sypaıy minezinen aınyǵan joq.
Brazılııalyqtyń osy bir áreketine namystanǵan Nursultan Jańabaev salmaq ólsheýge shyqqanda óz qarsylasyna: «Kór de tur, erteń seniń belbeýińdi alyp qoıamyn!», - dep aıqaı saldy.
Búgingi boks keshiniń basty jekpe-jeginde Qanat Islam (24-0, 19KO) kanadalyq Brendon Kýkke (18-0, 11KO) qarsy shyǵady. Olar birinshi orta salmaqtaǵy WBA Inter-Continental jáne WBO-NABO nusqasynyń chempıondyq ataqtaryn sarapqa salady. Boks keshin «Qazsport» telearnasy tikeleı efırde kórsetip jatyr. 20:00-de «Qazaqstan» ulttyq arnasynan da tikeleı efırge shyǵady. Budan bólek, Fite.tv ınternet arnasy, sondaı-aq TVtibi men Flipps arqyly tikeleı reportajdar júrigiziledi.
Alǵashqy jekpe-jekte qazaqstandyq boksshy Meıirim Nursultanov bir mınýttyń ishinde óz qarsylasyn nokaýtpen jeńdi.
