Dımash Nıý-Iork sahnasynda qazaqstandyq taǵy bir balanyń juldyzyn jaqty
«Baqytty Bala» mýzykalyq baıqaýynyń fınaly bıyl Aqtóbede ótken bolatyn. Oǵan Qazaqstan, Reseı, Ózbekstan, Ýkraına, Túrkııa, Belarýs jáne taǵy basqa memleketterden jas talanttar qatysty. Halyqaralyq dodanyń bas júldesin Nur-Sultan qalasynyń turǵyny Áıgerim Tileýbek pen RF-nyń Túmen qalasynan kelgen Islam Balkoev jeńip aldy.
Dımash Qudaıbergen de arnaıy syılyǵyn taǵaıyndap, Áıgerim Tileýbekti ózimen birge úlken sahnada óner kórsetýge alyp shyǵýǵa ýáde etken edi. Ótken jyly mundaı mártebege aqtóbelik Narǵyz Januzaqova ıe bolyp, Dımashpen birge Londonda án shyrqady.
Áıgerim – elordadaǵy №82 mekteptiń 6-synyp oqýshysy. Ol Amerıka sahnasynda «Gaýhartas» ánin oryndady.
«Bastapqyda kontsert qaı qalada bolatynyn bilgen joqpyn. Uıymdastyrýshylar bul týraly sál keıinirek aıtty. Nıý-Iorkte óner kórsetetinimdi bilgen kezde qýanyshymda shek bolǵan joq. Bul – meniń balalyq armanym. Armanym oryndalǵany úshin óte baqyttymyn», - deıdi ol.
Áıgerim 4-5 jasar kezinde Aıaz ataǵa Nıý-Iorktegi Bostandyq músinin kórgisi keletini týraly hat jazǵan. Al dál osy qalada Dımashpen óner kórsetetinin bilgende birden osy hat esine túsken.
«Buǵan deıin Túrkııada, Máskeýde boldym. Meniń armanym kóp, sonyń biri – álemdi sharlaý. Alǵan áserimdi jazyp otyrǵym keledi, sol sebepti Nıý-Iorkke barýdy asyǵa kúttim. Kún saıyn ol jaqta aýa raıy qalaı ekenin ınternet arqyly baqylap, sol jaqta júrgen kúnimdi elestettim», - deıdi oqýshy qyz.
Ol Dımashqa elikteıtinin jasyrmaıdy. Jas bolǵanyna qaramastan, túrli deńgeıdegi sahnalardy baǵyndyryp, álemge óz halqy týraly án shyrqap júr.
«Men elimizde Dımashtaı tulǵa bar bolǵanyn maqtan tutamyn. Oǵan uqsaǵym keledi. Dımash sııaqty ulttyq bolmysymdy jáne qarapaıymdylyq qasıetin saqtap qalǵym keledi. Elimniń mártebesin asqaqtatsam deımin», - deıdi ánshi.
Eske salaıyq, D.Qudaıbergenniń 10 jeltoqsanda Nıý-Iorkte ótken jeke kontsertine álemniń 60 elinen jankúıerler jınaldy. Olar ánshini Djon Kennedı atyndaǵy halyqaralyq áýejaıdan Qazaqstannyń Týymen qarsy alǵan bolatyn. Kontsert ótken «Barclays Center Arena» 19 myń orynǵa eseptelgen. Kórermenderdiń 75 paıyzy amerıkalyqtar boldy.
Gremmı syılyǵynyń ıegeri, perýlik ataqty ánshi Eva Aılan Dımash Qudaıbergendi kórý úshin óz kontsertin keıinge shegerip, Nıý-Iorkke ushyp keldi.
Kontsert Qazaqstannyń AQSh-taǵy mádenıet kúnderi aıasynda jáne QR Mádenıet jáne sport mınıstrliginiń qoldaýymen uıymdastyryldy.
Foto: dimashnews.com
