Dımash Qudaıbergenovtiń frantsýz tilindegi áni qandaı muńly bolsa, tarıhy da sondaı muńdy
ASTANA. QazAqparat - Qytaıdaǵy «Singer - 2017» án baıqaýyna qatysyp jatqan otandasymyz Dımash Qudaıbergenov frantsýz tilindegi «SOS d'un terrien en detresse» («Jabyrqap júrgen jer turǵynynyń SOS sıgnaly» - qaz.) atty ánin oryndap, qytaılyq kórermenderdi tánti etken bolatyn.
Osy shyǵarmanyń arqasynda kelesi kezeńge joldama aldy. QazAqparat tilshisi mıllıondaǵan tyńdarmannyń júregin eljiretip, kóńiline medeý bolǵan ánniń tarıhyn eske alǵandy jón kórdi.
Bul kompozıtsııada frantsýzdyń Gregorı Lemarshal atty jas ánshisiniń búkil ómiri, muńy men zary, qııal-armany kórinis tapqan. Quıryqty juldyzdaı jarq etip ótken onyń ómiri mýkovıstsıdoz sııaqty aıyqpas dertke shaldyqqandar úshin ǵana emes, on eki múshesi saý adamdar úshin de qajymas qaırat pen erik-jigerdiń sımvolyna aınaldy.
1983 dúnıege kelgen Gregorı Lemarshal eki jasqa kelgende dárigerler onyń mýkovıstsıdoz atty dertke shaldyqqanyn anyqtady. Tuqym qýalaýshylyq arqyly beriletin bul aýrýǵa qarsy em joq. «Mýkovıstsıdoz» sózi latynnyń eki sózinen turady: «mucus» - «shyrysh» jáne «viscidus» - «tutqyr, qoıý». Ondaı aýrý kezinde adam aǵzasynan bólingen shyrysh qoıý bolyp, uıqy bezi, baýyr, ishek, teri men silekeı bezderine zaqym keledi. Al ókpede qoıý qaqyryq jınalyp, aýa barmaı qalady. Sodan qan aınalymy nasharlap, qabyný protsessteri bastalady. Qatty jótel paıda bolady. Aýyratyn adam aýanyń jetispeýshiliginen qaıtys bolyp jatady. Sebebi ókpe tek 25 paıyzǵa ǵana jumys isteıdi.
Mine, osyndaı dertke shaldyqqan Greg taǵdyr tálkegine tótep bere bildi. Ókpeniń qabynýyna qaramastan, fýtbol, basketbol sııaqty sport túrlerimen aınalysty. Al 1995 jyly akrobatıkalyq rok-n-rolldan Frantsııa chempıony atandy. Sportpen kásibı túrde aınalysa almady. Sebebi oǵan úlken fızıologııalyq daıyndyq qajet boldy. Sodan Gregorı sport kommentatory bolamyn dep sheshti. Alaıda 1998 jyly Frantsııa fýtboldan Álem chempıony atanǵanda ákesimen bástesip, karaokede bir ándi oryndaýǵa ýáde berdi. Buǵan deıin ol óz boıyndaǵy ánshilik qasıetin baıqamady, tipti ata-anasynyń aqylyna da qulaq asqan joq. Alaıda karaokede múldem bóten adamdardyń onyń ónerine tánti bolǵanyn kórip, tolyǵymen mýzykaǵa aýysýǵa sheshim qabyldaıdy.
Sóıtip, 2005 jyly Gregorı Lemarshaldyń «Je deviens moi» («Men ózimdi taptym») atty alǵashqy albomy jaryqqa shyqty. Atalǵan jınaq birden búkil Frantsııaǵa taralyp ketti. Al kelesi jyldyń basynda Gregorı óz eliniń tanymal NRJ Music Awards baıqaýynda «Jyl jańalyǵy» syılyǵyna ıe boldy. Sodan Frantsııa, Belgııa men Shveıtsarııadaǵy gastrolder bastalady. Lara Fabıan, Andrea Bochellı, Selın Dıon, Patrısııa Kaas sııaqty sahnanyń maıtalmandary Gregorıdiń daýysyna, muqalmas rýhyna tánti boldy. «Greg sózben jetkize almaǵan nárseni daýyspen, kózben jetkize bildi», - deıdi tanymal ánshi Lara Fabıan.
Iá, Gregorı Lemarshal úshin árbir ándi oryndaý qanshalyqty aýyr bolǵanyn tek onyń ata-analary ǵana bildi. «Ulyma sofrologııa (ishki garmonııa) seanstary aýadaı qajet boldy. Áli esimde, Olımpııada kontsertke deıin on bes mınýt qalǵanda Gregorıdiń daýysy shyqpaı qaldy. Biz shuǵyl etıopatııanyń mamany Stefandy shaqyrtyp, kómek suradyq. Sonyń arqasynda Gregorı ándi aıtyp qana qoımaı, eń qıyn melodııalardy oryndap shyqty. Iá, oǵan óte aýyr boldy, sahnada qatty qınaldy. Kórermen qaýym eshteńe baıqaǵan da joq. Al sahnanyń arǵy jaǵyndaǵy bizdiń de, Olımpııa dırektorynyń da jasy sorǵalap turdy», - deıdi Gregorıdiń ákesi Per Lemarshal.
2007 jyly Gregorı densaýlyqtyń nasharlaýyna baılanysty úzilis alatynyn málimdedi. Soǵan qaramastan, ekinshi albomdy shyǵarýdy josparlaıdy, tipti Elen Segaramen birge «Vivo per lei» ánin oryndaıdy. Bul onyń sońǵy áni edi...
Sáýirdiń ekinshi jartysynda ony shuǵyl túrde Parıjge jaqyn aýrýhanaǵa jatqyzady. Oǵan ókpe aýystyrýdy josparlaıdy. Alaıda donor tabylmaı qalady. 2007 jyly sáýirdiń 30-y kúni Gregorı Lemarshal 23 jasynda qaıtys boldy.
Tanymal ánshi qaıtys bolsa da, onyń murasy óshken joq. Sol jyly Gregorı Lemarshal atyndaǵy mýkovıstsıdozben kúres qaýymdastyǵy qurylyp, mıllıondaǵan qarjy jınaldy. Ol qarajat aýrýdy zertteý jáne emhanalardy jóndeý jumystaryna jumsaldy. Sonyń arqasynda Eýropada mýkovıstsıdoz dertinen shaldyqqan adamdardyń ómiri 40 jasqa deıin ulǵaıdy.
Aıta keteıik, Dımash Qudaıbergenov «SOS d'un terrien en detresse» ánin 2015 jyly Belarýstyń Vıtebsk qalasynda ótken «Slavıanskıı bazar» baıqaýynda oryndaǵan bolatyn. Sol kezde ol bas júldeni jeńip aldy.
2013 jyly osy kompozıtsııany qazaqstandyq ánshi Qaırat Túntekov te oryndap kórgen.
