Dımash Qudaıbergenov ózin Vıtasqa teńeıtinderge nazyn bildirdi
ASTANA. QazAqparat - Qytaıdaǵy «The Singer - 2017» án baıqaýyna qatysyp jatqan otandasymyz Dımash Qudaıbergenov ózi týraly «Qazaqtyń Vıtasy», «Ekinshi Vıtas» syndy teńeý sózderdi quptamaıtynyn bildirdi.
«Árıne, Vıtas jaqsy ánshi, ony qurmetteımin, biraq men «Ekinshi Vıtas» emespin! Mýzykadan habary bar mamandar meni jaqsy túsinedi...», - dep jazdy ánshi óziniń Instagramdaǵy paraqshasyna.
Sonymen birge, ánshi kelesi baıqaýda Vıtastyń ataqty «Opera-2» ánin shyrqaıtynyn jáne bul ándi Vıtastyń daýysynan 2 ton joǵary oryndaýǵa bel býǵanyn málim etti. Kezekti baıqaý 28 qańtar kúni Beıjiń ýaqytymen 22:05-te bastalady. Al 30 qańtar kúni Dımash Qytaıdyń jańa jyldyq merekelik kontsertinde óner kórsetedi.
Aıta keteıik, qytaılyq izdeý saıtynda búgin «Dımash» sózi birinshi orynǵa shyqqan. Áleýmettik jelige qytaılyq tabynýshylar Dımashtyń sýretin júktep, óz sezimderin ashyq bildirýde. Olar Dımashtyń qazaq tilinde jazylǵan jazbalaryn túsine almaı, aýdaryp berýdi ótinip suraýda.
