Dımash Qudaıbergenov qytaısha sóıledi
ASTANA. QazAqparat - Qazaqstandyq ánshi Dımash Qudaıbergenov búgin Qytaıdyń «Singer2017» án baıqaýyna qatysatyndyǵyn rastady.
Bul týraly Dımash óziniń jańa ǵana ashqan Qytaılyq Sina Weibo (Týıtterdiń balamasy) áleýmettik mıkroblogynda jarııalady. Paraqshaǵa jazylýshylardyń sany az ýaqyttyń ishinde 4 myńnan asqan.
Dımash qytaılyq kórermenderge Weibo arqyly óziniń Hýnan telearnasynyń «Singer2017» telejobasyna qatysatyndyǵyn, sondaı-aq ózine qoldaý kórsetýin suraǵan vıdeosyn jarııalady.
4 mıllıonǵa jýyq oqyrmany bar Singer2017 uıymdastyrýshylarynyń arnaıy Weibo paraqshasynda jobaǵa qatysýshylardyń tolyq tizimi jáne afıshasy jarııalandy.
Aıta keterligi, vıdeo kórsetilgennen keıin qoldaýshylar 500-ge jýyq pikir jazyp, Dımashtyń jobadaǵy ónerine sáttilik tiledi. Al sol eldegi qandastarymyz Dımashtyń ánin tyńdaýǵa qumar bolǵan qytaılyqtar úshin arnaıy top quryp, ánderin júkteýge atsalysýda.
Eske sala keteıik, buǵan deıin Dımash Qudaıbergenovtiń osy án baıqaýyna qatysatyndyǵy týraly habarlaǵan bolatynbyz. Dımashtyń qytaılyq tanymal ánshi Han Hýnnyń «Tań atty» ánin sheber oryndaýy joba uıymdastyrýshylarynyń nazaryn aýdarǵan syńaıly.
El ishinde tanymal jobaǵa Taıvan, Makao, Sıngapýr jáne Koreıa, sonymen qatar Qytaıdyń eń tanymal juldyzdarynyń qatysatyny belgili.
Baıqaýdyń jalpy 5 irikteý kezeńi, sondaı-aq, jartylaı fınaly jáne fınaldyq saıystary 21 qańtardan 15 sáýir aralyǵynda Chansha qalasynda ótedi.
