Dımash Qudaıbergenov Qytaıdyń án baıqaýyna qatysady
ASTANA.QazAqparat - «Slavıan bazary - 2015» halyqaralyq án baıqaýynyń jeńimpazy, jerlesimiz Dımash Qudaıbergenov Qytaıdyń «Singer2017» án baıqaýyna qatysady, dep habarlaıdy QazAqparat tilshisi qytaılyq BAQ-qa silteme jasap.
Qytaılyq sina.com portaly 5 qańtarda baıqaýǵa qatysýshy 7 ánshiniń esimderin jarııalady. Jobaǵa qatysýshylar arasynda Dımash ta bar.
Qytaıdyń tanymal Sina Weibo (Týıtterdiń balamasy) qoldanýshysy óz paraqshasynda Dımashtyń Chansha qalasynda qydyryp júrgen vıdeosyn júktedi.
Aıta keterligi, Jobanyń uıymdastyrýshylary buǵan deıin jeke blogtarynda Qazaqstannan Qaırat Nurtastyń qatysatynyn aıtqan edi.
Koreıanyń «I Am a Singer» jobasynyń qytaılyq nusqasy elde úlken suranysqa ıe.
Joba Taıvan, Makao, Sıngapýr jáne Koreıanyń juldyzdary, sonymen qatar Qytaı ánshileriniń qatysýymen jurtshylyqqa tanymal bolyp otyr.
Al Dımashtyń esimi Qytaıǵa osy eldiń ataqty ánshi - kompozıtory Han Hýnnyń «Tań atty» ánin oryndaýymen belgili.
Baıqaýdyń jalpy 5 irikteý kezeńi, sondaı-aq, jartylaı fınaly jáne fınaldyq saıystary 21 qańtardan 15 sáýir aralyǵynda Chansha qalasynda ótedi.
