Dımash Qudaıbergenov alǵashqy án keshin beredi
ASTANA. QazAqparat - «Slavıan bazary - 2015» halyqaralyq án baıqaýynda Qazaqstannyń mártebesin kóterip, jeńiske jetken Dımash Qudaıbergenov elimizdiń barlyq óńirlerinde alǵashqy jeke kontsertin bermek.
Táýelsizdiktiń 25 jyldyǵyna arnalǵan «Umytylmas kún» án keshi 25 qalada ótedi dep josparlanýda. Atap aıtqanda, 9 sáýir - Oral qalasy («Jastar mádenıet úıi»), 10 sáýir - Aqsaı qalasy (Mádenıet úıi), 16 sáýir - Qulsary qalasy («Keń Jylyoı» Mádenıet úıi), 17 sáýir - Atyraý qalasy («Qurmanǵazy» Mádenıet úıi) turǵyndary alǵashqy bolyp jandy daýysta ótetin ánshiniń jeke kontsertin tamashalaı alady. Kesh qonaǵy, Dımashtyń ata-anasy, elimizge tanymal ánshiler Qanat jáne Sveta Aıtbaevtar bolady. Kesh barysynda ánshi halyq ánderimen birge, álemdik tanymal ánderdi, óziniń repertýaryndaǵy jańa ánderdi de shyrqaıdy.
Aıta keterligi, Dımash Qudaıbergenovtyń resmı saıty úsh tilde (qazaqsha, oryssha, aǵylshynsha) jumys isteı bastady. Ánshi týraly barlyq resmı jańalyqtar men aqparattardy www.dimashkudaibergen.com saıtynan alýǵa bolady.
