Dımash Qudaıbergenov: 17 mıllıon halyq jeńisimdi kútip otyr

Qytaı telearnasyna bergen suhbaty barysynda Dımash Qudaıbergenov ata-anasy qazaqtyń salt-dástúrin ustanatyndyǵyn atap ótken. «Ol kisiler mýzykaǵa degen yntamdy, mahabbatymdy kóre aldy. Anam aıaǵynyń aýyratynyna qaramastan 5 jasymnan mýzyka mektebine alyp baratyn. Aıaǵynda artrıti bolsa da eki saǵat kútip turatyn. Fortepıanoǵa apardy, odan keıin balalar arasyndaǵy túrli baıqaýlarǵa qatystyrdy. Eń aldymen, Alla taǵalanyń bergeni, ekinshiden, ata-anamnyń ánshi bolǵany men úshi zor baqyt edi», - dedi ol.

Sondaı-aq beınematerıalda Dımashtyń anasy Svetlana Aıtbaevanyń da shaǵyn suhbatynan úzindi berildi.

«Kishkentaı kezinen erinbeı izdenip, daıyndala beretin. Daýysyn san qubyltyp túrli jattyǵýlar jasaıtyn. Soǵan sáıkes tabıǵı daýys ta shyńdala túsedi. Ándi 4 oktavaǵa deıinde erkin aıtady», - dedi Dımashtyń anasy.

Dımash Qytaıdan habar kelgenge deıin de, habar kelgennen keıin de jáne dál qazirgi ýaqytta eseńgiregen kúıde júrgenin aıtty.

«Ár adam ózinshe myqty, keremet, ádemi. Meniń oıymdaǵysy  - ánimdi shyrqaý, qazaqsha án aıtyp berý, kórermenniń qoshemetine bólený. 17 mıllıon halyq, odan keıin alys, jaqyn sheteldegi tyńdarmannyń bári osyny kútip otyr», - dedi ol.

Sondaı-aq Dımashtyń anasymen telefon arqyly sóılesken sáti kórsetildi. «Mama bul jeńisimdi papam ekeýińe arnaımyn. Endi qıyndaý bolýy múmkin, birinshi aptada qonaq boldym. Endi únemi qonaq bolyp júre bermeısiń ǵoı. Eń bastysy, sahnaǵa shyǵyp, ánimdi oryndadym. Eger kórermen qoldaıtyn bolsa - 100 paıyzǵa daıynmyn», - dedi ol.

Aıta keteıik, Dımash Qudaıbergenov búgin keshqurym ótken «Singer 2017» baıqaýynyń atalmysh ekinshi kezeńinde de sátti óner kórsetip, kezekti ret bas júldege ıe boldy. Ol reseılik oryndaýshy Vıtastyń «Opera №2» ánin oryndady. Bul joly Dımashqa qoldaý bildirýge Qazaqstannan ákesi bardy. 

Dımash jobanyń birinshi kezeńinde frantsýzdardyń eń qıyn kompozıtsııalarynyń biri áıgili «SOS d'un terrien en détresse» ánin oryndaǵan bolatyn.