Dımash Qudaıbergenniń jankúıerleri «Astana Arena» alańyna jınalyp jatyr
ASTANA. KAZINFORM – Sanaýly saǵattan soń elordada álemge áıgili ánshi Dımash Qudaıbergenniń STRANGER atty jeke kontserti bastalady.
Qazirdiń ózinde «Astana Arena» mańynda Dımashtyń álemniń túkpir-túkpirinen kelgen jankúıerleri súıikti ánshileriniń kontsertin tamashalaýdy asyǵa kútip tur. Olardyń arasynda «Dımash», «Qazaqstan» dep urandatyp turǵandar bar.
Jınalǵandardyń arasynan AQSh, Túrkııa, Rýmynııa, Indonezııa, Ispanııa, Ońtústik Afrıka, Meksıka taǵy basqa elderden arnaıy kelgen týrısterdi baıqadyq.
Sondaı-aq, ózimizdiń Qaraǵandydan kelgen bir top jankúıerdi áńgimege tartqan edik.
«Biz 30 shaqty adam bolyp keldik, bıletti satylymǵa shyǵa sala aldyq. Otandasymyzǵa qoldaý bildireıik dep arena aldyna erterek jınaldyq», - deıdi Dımashtyń qaraǵandylyq jankúıeri Balqııa Ramazanova.
Aıta keteıik, búgin jáne erteń ótetin biregeı shoýdy tamashalaýǵa 50 elden kórermender keledi dep kútilip otyr.
Eske salsaq, Dımash Qudaıbergen V dúnıejúzilik kóshpendiler oıyndarynyń ashylý saltanatynda óner kórsetti.
Sondaı-aq, Ulttyq mýzeıde Dımash Qudaıbergenniń shyǵarmashylyǵyna arnalǵan kórme ashyldy.
«Dúnıe dıdaryndaǵy Dımash» kórmesine qazaq janynyń bolmysyn beıneleıtin, onyń qaıtalanbas únin qalyptastyrǵan, ómirindegi eleýli oqıǵalar týraly habar beretin qundylyqtar, tanymal tulǵalar men kóptegen jankúıerlerdiń syılyǵy qoıylǵan.
