Dımash Qudaıbergenniń jańa «Voice Beyond Horizon» jobasynda Qazaqstannyń atynan kim qatysady
ASTANA. KAZINFORM – Qazaqstan namysyn atalǵan jobada ánshi, mýzykalyq teatr jáne kıno akteri, vokaldyq sheberligi men sahnalyq áserlilikti úılestire bilgen óner ıesi Nurjas Sadyrbaı qorǵaıdy. Bul týraly dimashnews.com saıty jazdy.
2026 jyly Dımash Qudaıbergenniń Qytaıdyń Hunan Broadcasting System kompanııasymen birlesip daıyndaǵan «Voice Beyond Horizon» atty jańa halyqaralyq jobasy kórermenge jol tartpaq. Bul aýqymdy mýzykalyq shoýdyń qatysýshylary — alty elden kelgen segiz talantty ánshi.
Nurjas 2000 jyly Úshqudyq qalasynda dúnıege kelgen. 2019 jyly Naýaı qalasyndaǵy Memlekettik mádenıet jáne óner kolledjin «Akademııalyq vokal» mamandyǵy boıynsha támamdaǵan.
Joǵary bilimin ol Qazaq ulttyq óner ýnıversıtetinde Ashat Maemırov sheberhanasynda «Mýzykalyq teatr ártisi» mamandyǵy boıynsha aldy. Stýdenttik jyldarynda-aq kásibı sahnada óner kórsete bastaǵan. Onyń alǵashqy jarqyn rólderiniń biri «Romeo men Djýletta» mıýzıklindegi Romeo beınesi.
2020 jyldan beri Nurjas Astana qalasyndaǵy Memlekettik jas kórermen teatrynyń artisi bolyp qyzmet etedi. Ol «Qyz Jibek» operasyndaǵy Tólegen, «Mademýazel Nıtýsh» operettasyndaǵy Florıdor jáne «Shámshi» mıýzıklindegi Aqan seri rólderin tamasha somdaǵan.
Romantıkalyq týyndylardyń názik lırızmin de, dramalyq qoıylymdardyń tereń sezimin de sheber jetkize biletin Nurjas «Abaı — Toǵjan» spektaklinde Abaı rólin, «Gaýhartas» qoıylymynda Qaıyrken beınesin jáne basqa da kórkem obrazdardy somdady.
Kıno salasynda ol basty róldi «Estaı men Qorlan» mýzykalyq kórkem fılminde oınap, uly qazaq kompozıtory Estaıdyń beınesin shynaıy túrde somdap shyqty.
Aıta ketelik vetnamdyq BAQ Dımash Qudaıbergen týraly jazǵan edi.