Dımash Qudaıbergenniń «Voice Beyond Horizon» jobasy Túrkistanda kórsetildi
ASTANA. KAZINFORM — Túrkistan jerinde Dımash Qudaıbergenniń prodıýserlik «Voice Beyond Horizon» jobasy bastaý aldy.
Dımash Qudaıbergenniń «Voice Beyond Horizon» shoýynyń alǵashqy epızody shýaqty Túrkistanda 6 elden kelgen segiz qatysýshynyń basyn qosty.
Jobanyń bastamashysy ári qazylar alqasynyń tóraǵasy retinde Dımash áýeli ózi ashyq sahnaǵa shyǵyp, qatysýshylarǵa joǵary talap qoıyp, ónerpazdardy jańa belesterge jeteleıtin shyǵarmashylyq baǵyttyń kókjıegin keńeıtti.
«Fire» avtorlyq kompozıtsııasy tyńdaýshylarǵa tosyn formatta usynylyp, týyndylar tek aǵylshyn tilinde ǵana emes, qytaı tilinde de oryndaldy. Al qazaq tilindegi asa jyldam yrǵaqtaǵy rep elementiniń engizilýi kórermen tarapynan zor yqylasqa ıe boldy.
Baıqaýǵa qatysýshylar zamanaýı áýezdegi operalyq oryndaýdan bastap qytaıdyń bıik taýly aımaqtaryna tán áýenderine deıin, názik mahabbat ánderinen qyrǵyz tilindegi bıtboks elementteri qamtylǵan kompozıtsııalarǵa deıingi túrli janr men stıldegi mýzykalyq týyndylardy oryndady.
Qazaqstannyń atynan qatysqan Nurjas Sadyrbaev Dımash Qudaıbergenniń avtorlyǵymen jazylǵan «Samal» ánin ana tilinde oryndap berdi.
Joba erejesine sáıkes, árbir kontserttik nómirden keıin kórermender qatysýshylardyń ónerin baǵalap otyrdy. Baǵdarlama sońynda mýzykalyq sarapshylar Leı Tszıa men Dımash Qudaıbergen alǵashqy baıqaý kúniniń qorytyndysyn jarııalap, úzdik úsh oryndaýshyny anyqtady.
Nátıjesinde júldeli oryndarǵa ıe bolǵandar: Italııadan kelgen Djýlııa Falkone (úshinshi oryn), Qytaıdan Tsaı Chenıýı (ekinshi oryn) jáne alǵashqy epızodtyń jeńimpazy — qazaqstandyq Nurjas Sadyrbaev boldy.
— «Voice Beyond Horizon» shoýynyń alǵashqy shyǵarylymynyń júldegerleri men jeńimpazdaryn quttyqtaımyz! Kelesi aptada qatysýshylardyń Túrkistannyń kórikti oryndaryna jasaǵan qyzyqty saparyna kýá bolyp, olardyń kelesi shyǵarylymǵa daıyndyǵyn tamashalaı alamyz, — delingen habarladama.
Aıta ketelik Dımash Qudaıbergenniń halyqaralyq jobasy Almatyda kórsetilgen edi.