Dımash Qudaıbergenniń súıikti kitaby qandaı
ASTANA. KAZINFORM — Dımash Qudaıbergen «Kitap oqıtyn ult» respýblıkalyq marafonyna qatysady.
Ánshi óziniń Instagram-paraqshasynda «Kitap oqıtyn ult» respýblıkalyq marafonyna qatysatynyn habarlady.
— 2026 jyldyń mamyr aıynda Qazaqstan Respýblıkasynyń Prezıdenti «Kitap oqý mádenıetin damytý jáne zerdeli ult qalyptastyrý sharalary týraly» jarlyqqa qol qoıdy. Qasym-Jomart Kemeluly Toqaevtyń bastamasymen jáne Qazaqstan Respýblıkasynyń Mádenıet jáne aqparat mınıstrliginiń qoldaýymen elimizde oqý mádenıetin keńinen nasıhattaýǵa baǵyttalǵan «Kitap oqıtyn ult» atty jańa respýblıkalyq marafon bastaý aldy. Men de osy marafonǵa arnaıy, baıqaýdan tys «Parasat» sanaty boıynsha qatysýdy jón kórdim. Sońǵy ýaqytta oqyǵan kitaptarymnyń biri — belgili qazaqstandyq sýretshi, ıadrolyq qarýǵa qarsy qozǵalystyń belsendisi Káripbek Kúıikovtyń «Jızn bez rýk» («Qolsyz ómir») atty avtobıografııalyq týyndysy, — dep jazdy Dımash.
Onyń sózinshe, Qaraǵandy qalasynda kenshiler kúnine arnalǵan kontsert qarsańynda Káripbek aǵa Kúıikovpen júzdesip, jeke kezdesýdiń sáti túsken.
— Onyń ómir joly, taǵdyr taýqymetine moıymas qaısarlyǵy men rýhynyń beriktigi maǵan erekshe áser qaldyrdy. «Kitap oqıtyn ult» marafony jańa kitaptardy oqýǵa, olardan taǵylym alýǵa jáne oqyǵanymyzdy bir-birimizben bólisýge sebep bolsyn! — dep úndedi ánshi.
Buǵan deıin kitap oqýdy qoldaıtyndarǵa arnalǵan jańa marafon baǵyty ashylǵanyn jazǵanbyz.
