Dımash Qudaıbergenniń «Stranger» kontserttik týry álemniń 13 elinde ótti
ASTANA. KAZINFORM — «Qazaqstan – Armenııa – Vengrııa – Qytaı – Malaızııa – Túrkııa – Chehııa – Germanııa – AQSh – Meksıka – Ispanııa – Ulybrıtanııa – Latvııa» – Dımash Qudaıbergenniń «Jahankez» atty shyǵarmashylyq sapary 2022 jyly Almaty qalasynda bastalyp, elder men qurlyqtardy aralaı kelip, 2025 jyly Rıgada máresine jetti.
Aǵylshyn tilinen aýdarǵanda «Stranger» ataýy birneshe maǵynany bildiredi, ári olardyń barlyǵy úsh qurlyqty qamtyp, 13 elde kórsetilgen bul aýqymdy shoýǵa mazmundyq turǵydan tolyq sáıkes keledi.
Týrǵa ataý bolǵan án mátinine súıensek, «Jahankez» ataýy eń dál ári maǵynalyq turǵydan ornyqty nusqa ekeni anyq.
«Jańa jer — kózim jetkendeı, Jańa jer — tabanymnyń astynda. Bógde eldegi jolaýshy – Ózimdi tanýǵa berilgen jańa múmkindik…»
Sonymen qatar, sheteldik kóptegen buqaralyq aqparat quraly bul ataýdy «Beıtanys»dep túsindirip júr. Sebebi týr aıasynda Dımash birqatar elderge alǵash ret bardy.
Osy ataýlardy ózara sabaqtastyra otyryp jáne Dımashtyń óz sózderin eske alsaq, alys teńiz ben muhıttyń ar jaǵyndaǵy bul sapardyń negizgi maqsaty — týǵan eliniń mádenıetin múmkindiginshe keń aýdıtorııaǵa tanystyrý ekeni aıqyndalady.
Ádettegideı, týrdy Qazaqstannan bastaǵan ónerpaz mýzyka arqyly óz mıssııasyn júıeli túrde júzege asyryp keledi. Ol mýzykany tereń sezinetin, birlik pen beıbitshilikke umtylatyn, shynaıy ári artyq sentımentalızmnen quralmaǵan mahabbatty kórýge jáne tyńdaýǵa nıetti jandardy biriktiretin erekshe rýhanı orta qalyptastyrady.
Týr baǵdarlamasynyń qalaı jasalatyny jóninde Dımashtyń ata-anasy — Qanat jáne Svetlana Aıtbaevtar baıandady.
Olardyń aıtýynsha, shoý kontseptsııasyn eń aldymen Dımashtyń ózi aıqyndaıdy. Ol kontsertke tańdalǵan shyǵarmalardy eskere otyryp, baǵdarlamany óz rejısserlik kózqarasyna saı qurastyrady. Odan keıin rejısserlik top iske kirisip, ıdeıalar jan-jaqty taldanyp, nátıjesinde daıyn joba qalyptasady.
Týr aıasyndaǵy alǵashqy kontsertti daıyndaý barysynda shyǵarmashylyq, tehnıkalyq jáne uıymdastyrýshylyq toptardan turatyn 200-den astam adam jumyldyrylǵan. Almaty men Astanada tehnıkalyq jabdyqtardy ornatý jumystaryna ǵana júzden astam maman qatysqan. Al kostıým sheberlerin, volonterlerdi jáne ózge de sala qyzmetkerlerin esepke alǵanda, mundaı kontsertterge shamamen 400 adam tartylǵan.
Sheteldik kontsertterdi uıymdastyrý jumystary kontsert ótetin ýaqyttan 7–9 aı buryn bastalady. Bul rette qabyldaýshy eldiń zańnamalyq talaptary men mentalıtettik erekshelikteri eskeriledi. Gastroldik quram Qazaqstannan, Ispanııadan, Reseıden, Kýbadan, Germanııadan jáne Qytaıdan attanatyn mýzykanttardan, kontsert ákimshilerinen, tehnıkalyq personaldan turady. Bular — óz isiniń kásibı, tájirıbeden ótken mamandary. Al kontsert ótetin eldiń ózinde promoýterler men kontsert alańy qyzmetkerleri qosylyp, shamamen 200 adamnan quralǵan birtutas komanda qalyptasady.
Kontsertten keıin jazylǵan pikirlerdiń birinde: «Dımashtyń muny qalaı júzege asyratyny túsiniksiz, biraq árbir jańa kontserti — jańa bir ómir sekildi» delingen. Shynynda da, shoýdaǵy belgili bir sátti atap ótseńiz, Dears jankúıerleri onyń qaı qalada, qaı kontsertte bolǵanyn birden aıta alady.
Balasyn qolyna alǵan kúıde oryndalǵan «Znaı» — Antalııany eske túsiredi. 11 jastaǵy Gabrıelanyń oryndaýyndaǵy «Ave Maria» — Dıýsseldorftaǵy áserli sátter. Al Dımashtyń alǵashqy áýe akrobatıkasy — Astanada oryndalǵan «Lıýbov ýstavshıh lebedeı».
Úsh jyl ishinde Dımashtyń kontsertterinde kóptegen tanymal qonaqtar boldy. Qabyldaýshy eldiń qurmetti qonaqtary retinde Halýk Levent, Sıtı Nýrhalıza, Býrak Ieter óner kórsetti. Neıtan Vangpen birge Dımash alǵash ret sahnada Djekı Channyń «Avangard» fılminiń saýndtregi — «Happy» ánin usyndy. Renat Gaısınmen birge «Qaıran elim» kompozıtsııasy arqyly kórermendi kúrdeli tarıhı estelikter álemine jeteledi. Al Madison Square Garden sahnasynda Ýolter Afanasev «Love’s not over yet» ánin oryndap, ártiske súıemel jasady.
Kóptegen kontsertte kórermender Dımashtyń avtorlyq ánderiniń premerasyna kýá boldy: Almatyda — «The Story of One Sky» jáne «El Amor En Ti», Gonkongta — «When I’ve Got You» men «Smoke», Astanada — «Fire», Nıý-Iorkte — «Samǵaý» jáne «Living For The Game» týyndylary shyrqaldy.
Sondaı-aq, ártis keıbir qalalarda jergilikti tyńdarmandardy qabyldaýshy eldiń tilindegi ándermen qýantty: Erevanda — «Sarerı ovın mernem», Ystambulda — «Gesi Bağlari», Barselona men Mehıkoda — «Besame mucho».
«Siz jankúıerlerge qanshalyqty táýeldisiz?» degen saýalǵa Dımash bylaı dep jaýap berdi.
— Qarapaıym tilmen aıtqanda — maksımaldy túrde. Kez kelgen ártis úshin, sonyń ishinde men úshin de, kórermensiz bul kásiptiń máni joq ekenin túsinemin. Men neoklassıka janryndaǵy baǵytymdy saqtaı otyryp, ártúrli stılde, túrli baǵytta án aıtamyn. Mýzykamnyń jappaı qalaı qabyldanatynyna asa qatty táýeldi bolýǵa tyryspaımyn, sebebi ol belgili bir deńgeıde ózindik ereksheligi bar mýzyka. Barsha kórermenge meni barlyq iste qoldap júrgenderi úshin alǵys aıtamyn. Meni sizdermen qaýyshtyrǵany úshin Allaǵa myń shúkirshilik aıtamyn, — Dımash Qudaıbergen.
2025 jyly Dımash Qytaı, Qyrǵyzstan, Vetnam sııaqty elderde kontsert berip, Almaty men Aqtaýda jerlesterimen kezdesti.
Sondaı-aq alǵash ret Afrıka qurlyǵyna — Mysyr eline taban tiredi. Bul — aldaǵy joldyń ashyq ekenin, alda talaı tyń ári mańyzdy sharalardyń turǵanyn bildiredi.